Paynet’ni xususiylashtirish ishlari boshlandi

O‘zbekiston Prezidentining joriy yil 18-martdagi qaroriga muvofiq, UzPaynet kompaniyasining 100 foiz davlat ulushini xususiylashtirish belgilangan.

Davlat aktivlarini boshqarish agentligi (DABA) UzPaynet’ni xususiylashtirish bo‘yicha konsalting kompaniyasi tanlab olinishi yuzasidan tanlov e’lon qildi.

Barcha qiziqish bildirgan talabgorlar takliflarini joriy yil 1-iyul kuni soat 18:00 ga qadar DABAga taqdim etishlari mumkin.

Konsultantlar talab etilgan ish hajmini to‘liq bajarish uchun konsorsiumga kirishlari yoki birgalikda qo‘shma takliflar taqdim etishlari mumkin.

Agar konsorsium tomonidan ariza berilsa konsorsium bitimi taqdim etilishi so‘raladi. 

Agar birgalikda qo‘shma tijorat taklifi taqdim etilsa jalb qilingan sherik-konsultantning ham ishini muvofiqlashtirish uchun mas’ul va javobgarlikni zimmasiga oladigan asosiy konsultant ko‘rsatilishi lozim.

UzPaynet qanday kompaniya?

UzPaynet MCHJ — Paynet to‘lov tizimining asoschisi hisoblanadi.

UzPaynet kompaniyasi O‘zbekiston bozorida 2005-yildan buyon 390 dan ortiq turli xizmatlarni ko‘rsatib kelmoqda. 

Jumladan, “Paynet.uz” mobil ilovasi orqali barcha kommunal to‘lovlarni amalga oshirish mumkin. Kompaniyaning respublika bo‘yicha 21 mingta to‘lov punktlari xizmat ko‘rsatmoqda. 

Har kuni 1,3 milliondan ortiq foydalanuvchi Paynet tizimi orqali to‘lovlarni amalga oshiradi.

2021-yil yakuni bo‘yicha kompaniyaning ustav kapitali 378,5 mln so‘m, sof aktivlari — 71,8 mlrd so‘m, sof foydasi — 94,6 mlrd so‘mni tashkil etgan.

Avvalroq “Farg‘ona neftni qayta ishlash zavodi” 100 million dollarga sotilishi haqida xabar berilgandi.