Emomali Rahmon ikki kunlik rasmiy tashrif bilan O‘zbekistonda bo‘lishi kutilmoqda. Bu haqda Tojikiston prezidenti matbuot xizmatiga tayanib, Asia-Plus xabar berdi.
Qayd etilishicha, 2—3-iyun kunlariga rejalashtirilgan tashrif doirasida Imomali Rahmonning O‘zbekiston oliy rahbariyati bilan rasmiy uchrashuvlar o‘tkazilishi, uning yakunlari bo‘yicha bir qator hujjatlar imzolanishi kutilmoqda.
Bo‘lajak uchrashuvlar kun tartibidan mamlakatlar o‘rtasidagi savdo-iqtisodiy, transport-kommunikatsiya va madaniy-gumanitar sohalardagi hamkorlikni rivojlantirish masalalari o‘rin olgan.
Emomali Rahmonning O‘zbekistonga kutilayotgan rasmiy tashrifi munosabati bilan “Xovar” agentligi Tojikistonning O‘zbekistondagi elchisi Abdujabbor Rahmonzodaning maqolasini e’lon qilgan. Unda aytilishicha, prezidentning Toshkentga tashrifi doirasida ishbilarmonlik uchrashuvlari, investitsiyaviy forum, mintaqaviy ilmiy-amaliy anjuman va qator madaniy tadbirlar ham rejalashtirilgan.
“Dunyo” axborot agentligining xabar berishicha, 30-may kuni Dushanbeda bo‘lib o‘tgan Savdo-iqtisodiy hamkorlik bo‘yicha O‘zbekiston—Tojikiston hukumatlararo komissiyasining navbatdagi majlisida ham Emomali Rahmonning O‘zbekistonga tashrifi muhokama qilingan.
Unda ta’kidlanishicha, Tojikiston prezidentining O‘zbekistonga bo‘lajak rasmiy tashrifi davlatlari o‘rtasida strategik sheriklikni yanada mustahkamlashda katta tarixiy ahamiyatga ega bo‘ladi. Majlisda ushbu tashrif kun tartibini aniq amaliy mazmun bilan to‘ldirish, rejalashtirilgan barcha tadbirlarni yuqori saviyada amalga oshirish masalalariga alohida e’tibor qaratilgan.
Shavkat Mirziyoyev va Emomali Rahmon so‘nggi marta 4-may kuni telefon orqali muloqot qilgan edi. O‘shanda davlat rahbari Tojikiston prezidentini qulay vaqtda O‘zbekistonga rasmiy tashrif bilan kelishga taklif qilgan.
Izoh (0)