Ўзбекистон Президентининг жорий йил 18 мартдаги қарорига мувофиқ, UzPaynet компаниясининг 100 фоиз давлат улушини хусусийлаштириш белгиланган.
Давлат активларини бошқариш агентлиги (ДАБА) UzPaynet’ни хусусийлаштириш бўйича консалтинг компанияси танлаб олиниши юзасидан танлов эълон қилди.
Барча қизиқиш билдирган талабгорлар таклифларини жорий йил 1 июль куни соат 18:00 га қадар ДАБАга тақдим этишлари мумкин.
Консултантлар талаб этилган иш ҳажмини тўлиқ бажариш учун консорсиумга киришлари ёки биргаликда қўшма таклифлар тақдим этишлари мумкин.
Агар консорсиум томонидан ариза берилса консорсиум битими тақдим этилиши сўралади.
Агар биргаликда қўшма тижорат таклифи тақдим этилса жалб қилинган шерик-консултантнинг ҳам ишини мувофиқлаштириш учун масъул ва жавобгарликни зиммасига оладиган асосий консултант кўрсатилиши лозим.
UzPaynet қандай компания?
UzPaynet МЧЖ — Paynet тўлов тизимининг асосчиси ҳисобланади.
UzPaynet компанияси Ўзбекистон бозорида 2005 йилдан буён 390 дан ортиқ турли хизматларни кўрсатиб келмоқда.
Жумладан, «Paynet.uz» мобил иловаси орқали барча коммунал тўловларни амалга ошириш мумкин. Компаниянинг республика бўйича 21 мингта тўлов пунктлари хизмат кўрсатмоқда.
Ҳар куни 1,3 миллиондан ортиқ фойдаланувчи Paynet тизими орқали тўловларни амалга оширади.
2021 йил якуни бўйича компаниянинг устав капитали 378,5 млн сўм, соф активлари — 71,8 млрд сўм, соф фойдаси — 94,6 млрд сўмни ташкил этган.
Аввалроқ «Фарғона нефтни қайта ишлаш заводи» 100 миллион долларга сотилиши ҳақида хабар берилганди.
Изоҳ (0)