Erdo‘g‘on Putinga Istanbulda Rossiya, Ukraina va BMT muzokaralarini tashkillashtirishni taklif qildi

Turkiya prezidenti Rajab Toyyib Erdo‘g‘on Rossiya prezidenti Vladimir Putinga Istanbulda Rossiya, Ukraina va BMT vakillari uchrashuvini tashkillashtirishni taklif qildi, deb yozadi Meduza Turkiya yetakchisi matbuot xizmatiga tayanib. Taklif 30-may kuni o‘tkazilgan telefon suhbati chog‘ida berilgan.

Shuningdek, Erdo‘g‘on agar Moskva va Kiyev bu haqda kelishuvga erishsa, Turkiya Ukrainadagi vaziyat ustidan “kuzatish mexanizmi”da qatnashishga tayyorligini ma’lum qildi.

Kreml Erdo‘g‘on va Putin o‘rtasidagi telefon suhbati haqidagi xabarida Turkiya prezidentining Istanbulda Rossiya, Ukraina va BMT muzokaralarini tashkil qilish haqidagi taklifini tilga olmagan.

Rossiya prezidenti ma’muriyati xabariga ko‘ra, Putin Erdo‘g‘on bilan Qora va Azov dengizlarida kemalar qatnovi xavfsizligi masalasini, shuningdek, Rossiyaning Ukraina bilan urushi  tufayli oziq-ovqat yetkazib berish bilan bog‘liq muammolarni muhokama qilgan.

“Rossiyaga qarshi tegishli sanksiya cheklovlari bekor qilingan taqdirda, Rossiya katta hajmda o‘g‘it va qishloq xo‘jalik mahsulotlari eksport qilishi mumkinligi tasdiqlandi”, — deyiladi Kreml xabarida.

Ukraina va Rossiya delegatsiyalari (BMT ishtirokisiz) mart oxirida Istanbulda uchrashgan edi. Muzokaralar yakunlariga ko‘ra Ukraina mamlakatning neytral maqomini ko‘zda tutuvchi tinch yo‘l bilan tartibga solish rejasini taqdim etgan, Rossiya esa Kiyev va Chernigov viloyatidan qo‘shinlarini olib ketishini ma’lum qilgan edi.

Bu Rossiya va Ukraina muzokaralarining so‘nggi yuzma-yuz raundi bo‘ldi. Shundan keyin muzokaralar jarayoni muzlatib qo‘yildi. Moskva bunda Kiyevni aybladi, Ukraina hukumati o‘z navbatida muzokaralarni davom ettirishga tayyorligini, faqat Rossiya tomonidan “ultimatumlar” bo‘lmasligi kerakligini aytdi.