Turkiya prezidenti Rajab Toyyib Erdo‘g‘on o‘lgunicha mamlakatdagi tarafdorlari bilan qolish niyatida ekanini aytdi. Bu haqda u Istanbul fath etilishining 569 yilligi munosabati bilan o‘tkazilgan mitingda aytib o‘tdi. Shu tariqa Erdo‘g‘on muxolifatchi siyosatchilarning Turkiya prezidenti respublikadan qochib ketishni rejalashtirayotgani haqidagi da’volariga javob qaytardi.
“Biz so‘nggi nafasimizgacha shu yerda bo‘lamiz. Ular Toyib Erdo‘g‘on mamlakatdan qochib ketadigan odam, deb o‘ylamoqda. Lekin mana, Erdo‘g‘on Atakyo‘yda (Istanbuldagi tuman — tahr). O‘lgunimizcha shu yerdamiz”, — dedi u.
25-may kuni muxolifatdagi Turkiya Xalq partiyasi yetakchisi Kamol Qilichdoro‘g‘li Erdo‘g‘onlar oilasini AQSHga millionlab dollar olib chiqib ketganlikda aybladi. U, shuningdek, Erdo‘g‘onning mamlakatdan qochish rejasini ommaga fosh qilishga va’da berdi.
Turkiyada 2021-yil prezidentlik saylovlari o‘tkazilishi rejalashtirilgan. Turkiyaning SONAR tadqiqot tashkiloti ma’lumotlariga ko‘ra, 2022-yil may holatiga ko‘ra, amaldagi prezidentning reytingi 34,8 foizni tashkil qiladi. Qilichdaro‘g‘lining reytingi esa — 3,5 foiz.
Erdo‘g‘on Shvetsiya va Finlyandiya delegatsiyalari bilan NATO masalasi bo‘yicha muzokaralardan noroziligini ham bildirdi. Erdo‘g‘on Xelsinki va Stokgolmni “insofsizlik va nosamimiylik” uchun qoraladi.
“Afsuski, delegatsiyalar uchrashuvi biz kutgan darajada bo‘lmadi”, — deya Erdo‘g‘onning so‘zlarini keltirmoqda TRT.
Turkiya prezidenti uchrashuvni boshqa darajada o‘tkazishga umid qilayotganini aytdi. Erdo‘g‘onning qayd etishicha, u Turkiya prezidenti bo‘lib turgan ekan, mamlakat terrorizmni qo‘llab-quvvatlovchi davlatlarning NATOga kirishiga “ha” deya olmaydi.
Avvalroq NATO bosh kotibi Yens Stoltenberg Shvetsiya va Finlyandiya Turkiyaning talablarini bajarmasa, NATOga a’zolik uchun nomzod bo‘lishi dargumon ekanini aytgandi.
18-may kuni Shvetsiya va Finlyandiya NATOga a’zo bo‘lish uchun ariza topshirgan. Bu davlatlar rasmiylarining qarori Ukrainada Rossiya bosqini boshlanganidan keyin xavfsizlik sohasidagi o‘zgarishlar bilan izohlangan. Ular ushbu qaror Rossiyaga qarshi qaratilmaganini va faqat o‘z xavfsizligini ta’minlash maqsadida qabul qilinganini ta’kidladi.
Izoh (0)