Janubiy Osetiya prezidenti Alan Gagloyev 2022-yil 17-iyul kuni Rossiya bilan birlashish haqida referendum o‘tkazilishini ko‘zda tutuvchi farmon amal qilishini to‘xtatib qo‘ydi, deb yozadi Meduza.
“RBK” xabariga ko‘ra, hujjatning amal qilishi Rossiya bilan barcha maslahatlashuvlar yakunlanguniga qadar to‘xtatib qo‘yilgan.
Janubiy Osetiya prezidenti saytida ma’lum qilishicha, Gagloyev “referendumga chiqariladigan masalaning huquqiy oqibatlari noaniqligini hisobga olgan holda” “Rossiya Federatsiyasi qonuniy huquq va manfaatlariga taalluqli masalalar bo‘yicha referendumni bir tomonlama hal qilib bo‘lmasligini tan olgan” va “Janubiy Osetiya fuqarolarining Rossiya bilan integratsiya haqidagi tashabbusini to‘liq qo‘llab-quvvatlagan holda” farmon amal qilishini to‘xtatgan.
Janubiy Osetiya prezidenti “Janubiy Osetiya Respublikasi va Rossiya Federatsiyasining bundan keyingi integratsiyalashuvi bilan bog‘liq barcha savollar majmui bo‘yicha Rossiya tomoni bilan zudlik bilan maslahatlashuvlar o‘tkazish”ni topshirdi.
Janubiy Osetiyaning Rossiyaga qo‘shilishi haqidagi referendumni respublikaning avvalgi prezidenti Anatoliy Bibilov belgilagan edi. U tegishli farmonni 13-may kuni — prezident saylovida Gagloyevga mag‘lub bo‘lganidan keyin imzolagandi.
Kreml may oyi oxirida referendumni tashkillashtirishda ishtirok etmayotganini ma’lum qilib, undagi savollarni qanday tuzish haqida o‘ylab ko‘rishni taklif etgandi.
Dunyo mamlakatlarining ko‘pchiligi Janubiy Osetiya mustaqilligini ham, uning prezidenti saylovlari natijalarini ham tan olmaydi.
Janubiy Osetiya prezidenti Anatoliy Bibilov hududning Rossiyaga qo‘shilishi haqidagi rejalar haqida 30-mart kuni e’lon qilgandi. U Shimoliy Osetiya bilan bir hududga birlashish taklifini bergan. Aprelda Janubiy Osetiyada prezidentlik saylovlari o‘tkazilgan va 56,09 foiz olgan Alan Gagloyev g‘alabaga erishgan. Gagloyev Rossiyaga qo‘shilish bo‘yicha referendumni kechiktirish haqida gapirgan. Biroq Bibilov umumxalq muhokamasini 17-iyulga ko‘chirishga qaror qildi.
Izoh (0)