Pentagon rahbari Lloyd Ostin 13-may kuni Rossiya mudofaa vaziri Sergey Shoygu bilan telefon orqali suhbatlashdi. Bu haqda AQSH Mudofaa vazirligi xabar qildi.

Qayd etilishicha AQSH va Rossiya mudofaa vazirlarining 2022-yildagi birinchi suhbati 18-fevralda o‘tkazilgan.

“Ostin Ukrainadagi harbiy harakatlarni zudlik bilan to‘xtatishga chaqirdi va o‘zaro aloqani qo‘llab-quvvatlash muhimligini ta’kidladi”, — deyiladi Pentagonning muzokaralar yakuni yuzasidan bayonotida.

Rossiya Mudofaa vazirligining xabarida telefon suhbatining AQSH tomoni tashabbusi bilan amalga oshirilgani qayd etilgan.

“Xalqaro xavfsizlikka aloqador dolzarb masalalar, xususan, Ukrainadagi vaziyat muhokama etildi”, — deyiladi Rossiya Mudofaa vazirligining axborotida.