«Грунт қироли» амалдаги чемпионга қарши. Рафаэль Надаль ва Новак Жокович Ролан Гарроснинг чорак финалидаёқ ўзаро тўқнаш келади

Франциянинг Париж шаҳрида теннис бўйича «Улкан тож» туркумига кирувчи Голан Гаррос—2022 мусобақаси давом этмоқда.

29 май куни мусобақанинг 1/8 финалидан ўрин олган тўртта ўйин бўлиб ўтди. Жаҳоннинг биринчи рақамли теннисчиси Новак Жокович аргентиналик Диего Шварсманни мағлуб этиб (6:1, 6:3, 6:3), чорак финалга йўл олди. Жокович ярим финал йўлланмаси учун 31 май куни испаниялик Рафаэль Надалга қарши кортга чиқади. Надал 1/8 финалда Канада вакили Феликс Оже-Аляссимни беш сет натижасига кўра (3:6, 6:3, 6:2, 3:6, 6:3), мағлубиятга учратди.

АТП рейтингида учинчи поғонада бораётган Александр Зверев чорак финалда йил кашфиёти сифатида эътироф этилаётган 19 ёшли испаниялик ракеткачи Карлос Алкарас билан баҳс юритади.

Шу тариқа, Надал ва Жокович 59 марта ўзаро тўқнаш келадиган бўлди. Шу вақтда қадар Новак 30 марта ғалаба қозонган бўлса, Рафа 28 бор рақибидан устун келган. Бироқ грунтли кортларда Надал катта устунлик билан олдинда — 19:8.

Маълумот учун, Жокович ва Надал Ролан Гаррос—2021 чорак финалида ҳам ўзаро дуч келиб қолганди. Унда сербиялик теннисчининг қўли баланд келган. Новак финалда Стефанос Циципасни енгиб, мусобақа ғолибига айланганди.

Аввалроқ Надал «Улкан тож»даги 300-ғалабасини қўлга киритиб, бу борада Жокович ва Рожер Федерернинг натижасини такрорлагани хабар қилинганди.