“O‘zbekneftgaz” benzin narxining oshgani bo‘yicha rasmiy bayonot berdi

Toshkent shahridagi avtomobillarga yonilg‘i quyish shoxobchalarida Ai-80 markali benzin narxi ko‘tarilib, 6800 so‘mni tashkil qilayotgani to‘g‘risida xabar berilgandi. “O‘zbekneftgaz” narxlarning oshishi bo‘yicha rasmiy bayonot berdi.

Jahon bozorida Brent markali neft narxining o‘zgarishi butun dunyodagi benzin va boshqa neft mahsulotlari narxlarining o‘sishi yoki tushishiga ta’sir etuvchi muhim omil hisoblanadi. Bugungi kunda AQSHda benzin rekord darajada qimmatlagan, Yevropa davlatlari, jumladan, Germaniya, Shvetsiya, Niderlandiya, Islandiya, Gretsiya, Daniya, Finlyandiya, Norvegiya, Belgiyada bir litr benzin narxi 2,242-2,564 AQSH dollarini tashkil etib, narxlarning oshib borishi davom etmoqda.

Misol uchun, yil boshiga nisbatan neft xomashyosi kotirovkasi 1,3 barobarga (1 barreli uchun 115 dollar), Yevropa davlatlarida AYQSHdagi benzin chakana narxi 1,2-2 barobarga oshib, tarixiy antirekordlar yangilangan.

Ta’kidlanishicha, bu o‘z navbatida respublikada neft va gaz mahsulotlariga, shu jumladan, avtobenzin mahsulotiga, ortib borayotgan talabni qondirish hisobiga narxlarning barqarorligini ta’minlashga ijobiy ta’sirini ko‘rsatadi. Butun jahonda kuzatilayotgan keskin narxi oshishi O‘zbekistondagi avtobenzin narxiga ham salbiy ta’sir ko‘rsatmoqda. Shunga qaramay, narxlar tebranishining oldini olish uchun ishlab chiqarish ko‘rsatkichlari oshirilib, qayta ishlash bo‘yicha yangi imkoniyatlar ishga solinmyapti.

Bunda, “O‘zbekneftgaz” AJ bo‘yicha 2022-yilning 5 oyligida 623,9 ming tonna suyuq uglevodorodlar qazib chiqarilishi belgilangan bo‘lsa, amalda 657,5 ming tonna qazib chiqarilgan yoki prognozga nisbatan 105,4 foiz (o‘tgan yilning mos davriga nisbatan 101,2 foiz).

Mos ravishda jamiyat tasarrufidagi neftni qayta ishlash zavodlarida 2022-yilning 5 oyligida 603,1 ming tonna uglevodorod xomashyosi qayta ishlanishi belgilangan bo‘lsa, amalda 626,1 ming tonna (prognozga nisbatan 103,8 foiz)ni qayta ishlangan (o‘tgan yilning mos davriga nisbatan 107,6 foiz).

Shu bilan birga, yanvar—may oylarida 353,9 ming tonna avtobenzin ishlab chiqarilishi belgilangan bo‘lsa, amalda 381,4 ming tonna ishlab chiqarilgan yoki prognozga nisbatan 107,8 foizni tashkil etgan (o‘tgan davrning mos davriga nisbatan 106,7 foiz).

Ma’lumot uchun, Buxoro neftni qayta ishlash zavodida amaldagi texnik-iqtisodiy asoslanishi ko‘rsatkichlariga ko‘ra, avtobenzin mahsuloti bo‘yicha yillik ishlab chiqarish quvvati 641 ming tonnani tashkil etsa (5 oylik hisobda – 267,1 ming tonna), 2022-yilning 5 oyligida 381,4 ming tonna (quvvatlardan foydalanish darajasi 142,8 foiz) avtobenzin mahsuloti ishlab chiqarilgan.

Shu bilan birga, Ai-80 markali avtomobil benzinining birja savdolaridagi o‘rtacha narxi yil boshida 1 tonnasi uchun 7—7,3 million so‘m (1 litri uchun 5 300—5 500 so‘m) miqdorida shakllangan bo‘lsa, bugungi kunda 8,4 – 8,7 million so‘m (1 litri uchun 6 300—6 500 so‘m) miqdorida shakllanmoqda.

Toshkent shahridagi yirik AYQSHlarda 1 litr Ai-80 markali avtobenzin narxi quyidagicha kuzatilmoqda:

• UNG Petro – 6 800 so‘m,
• IBR, Miss, Poytaxt Oil – 6 800 so‘m,
• Mustang – 6 900 so‘m,
• LUK Oil – 6 990 so‘m,
• Intran servis – 7 000 so‘m,
• TAT neft – 7 400 so‘m.

Eslatib o‘tamiz, Respublika tovar-xomashyo birjasi O‘zbekistonda 2021-yil boshidan buyon avtomobil benzini segmentida narxlarning o‘sishiga oid ma’lumotlarini e’lon qilgandi. Unga ko‘ra, Ai-80 benzini narxi o‘rtacha 63,2 foizga o‘sgan. Keyinchalik O‘zbekistonda 2022-yildan boshlab Ai-80 benzinidan bosqichma-bosqich voz kechish rejalashtirilayotgani xabar qilindi. Uning o‘rniga Ai-92 benzini ishlab chiqarilishi aytilgandi.