Qoraqalpog‘istonga iyun oyida AQSHdan tibbiy buyumlarini o‘z ichiga olgan to‘rtta konteynerda gumanitar yordam olib kelinadi. Bu haqda “Dunyo” agentligi xabar berdi. Tovarlarni topshirish va yetkazib berish AQSHda joylashgan Project C.U.R.E. xayriya loyihasi tomonidan O‘zbekistonning Vashingtondagi elchixonasi ko‘magida amalga oshirilmoqda.
Umumiy og‘irligi 16,8 tonnani tashkil etadigan gumanitar yordamning ichidan 2,9 ming quti tibbiy tovarlar o‘rin olgan bo‘lib, iyun oyida ular Qoraqalpog‘iston sog‘liqni saqlash organlariga topshiriladi.
Elchi Javlon Vahobov Project C.U.R.E. loyihasi prezidenti Duglas Jekson bilan avval erishilgan kelishuvlari doirasida 3 million dollarlik tibbiy asbob-uskunalar va sog‘liqni saqlash buyumlarini yetkazib berish bo‘yicha Orolbo‘yi mintaqasida tibbiy asbob-uskunalar uchun eng zarur bo‘lgan 24 ta tibbiyot muassasasi ro‘yxatini tuzgan.
Project C.U.R.E.ning xalqaro hukumatlar bilan ishlash bo‘yicha direktori Melisa Espostining ma’lum qilishicha, to‘rtta konteynerning barchasi AQSHdan Yevropaga dengiz yo‘li orqali yuborilgan va hozirda ular yo‘lda. Amerika tomonining ma’lumotlariga ko‘ra, ular Gruziyaga yetkaziladi va u yerdan yerusti transportida Nukus shahriga olib kelinadi.
Elchixona ma’lumotlariga ko‘ra, konteynerlar ichidan UTT, IVL kabi apparatlar, kislorod konsentratorlari, rentgen skanerlari, yangi tug‘ilgan chaqaloqlar uchun intensiv terapiya inkubatorlari, defibrillyatorlar, laboratoriya uskunalar, kislorod balonlar, bemorlarni tashish uchun aravachalar, operatsiya stollari uchun matraslar va boshqa tibbiy tovarlar o‘rin olgan.
Ma’lumot uchun, 1987-yilda tashkil etilgan Project C.U.R.E. nodavlat tashkiloti loyihasi rivojlanayotgan mamlakatlarga zamonaviy tibbiy asbob-uskunalar va asboblar etishmasligini bartaraf etishda yordam beradi. Hozirda uning faoliyati dunyoning 135 davlatini qamrab olgan. 2021-yilning may oyida Qoraqalpog‘iston tibbiyot muassasalariga C.U.R.E. loyihasining birinchi ikki konteyneri, jumladan, shoshilinch tibbiy yordam markazlarini jihozlash uchun zarur bo‘lgan tibbiy buyumlar kelib tushgan edi.
Eslatib o‘tamiz, Prezident Shavkat Mirziyoyev BMT Bosh Assambleyasining 75-sessiyasidagi nutqida Orolbo‘yi mintaqasini ekologik innovatsiya va texnologiyalar hududi deb e’lon qilish haqida BMT rezolyutsiyasini qabul qilishni taklif etgandi.
Izoh (0)