Toshkent shahridagi jamoat transportlariga chiqish-tushishda yangicha tartib o‘rnatilgani, unga ko‘ra endi yo‘lovchilar avtobusning old eshigidan chiqib, orqa eshigidan tushishi to‘g‘risida xabar berilgandi. “Toshshahartransxizmat” mazkur yangicha tartibga izoh berdi.
Jamoat transportida (avtobuslar va elektrobuslar) joriy etilayotgan yangi tartib qoidaga asosan, yo‘lovchilar avtobus va elektrobuslarning saloniga faqat old eshikdan haydovchining yonida o‘rnatilgan maxsus validator va qurilma orqali yo‘l haqi uchun to‘lovni amalga oshirgandan so‘ng kirishlari hamda salondan tushayotganlarida o‘rta va orqa eshiklardan foydalanishlari kerak.
Ushbu tartib-qoida xorijiy davlatlar tajribasidan kelib chiqqan holda jamoat transportida yo‘lovchilar harakatini tartibga solish, transport madaniyatini yanada oshirish va yo‘lovchilar tashishdan tushadigan daromadlar shaffofligini ta’minlash maqsadida joriy etilmoqda.
Shuningdek, poytaxt bo‘ylab harakatlanuvchi avtobus yo‘nalishlarida mazkur tartib qoida belgilangan reja asosida bosqichma-bosqich, ya’ni birinchilardan bo‘lib belgilangan yo‘nalish jadvallari soni to‘liq bo‘lgan, harakat davomida oraliq intervali qisqa bo‘lgan avtobus yo‘nalishlarida joriy etilmoqda. Xususan, hozirda 51-sonli avtobus yo‘nalishida (Yutong rusumli elektrobus)da joriy etilgan.
O‘zbekiston prezidentining tegishli qaroriga asosan 2022-yil yakuniga qadar 20 dona elektrobus, 190 dona katta sig‘imli, 200 dona o‘rta sig‘imli avtobuslar xarid qilish orqali “Toshshahartransxizmat” AJ harakat tarkibini yangilash belgilangan. Hozirgi kunga qadar 20 dona elektrobus va 30 dona SAZ LE-60 rusumli o‘rta sig‘imli avtobuslar xarid qilingan va 51,81, 98, 17T, 32-sonli yo‘nalishlarga tasarruf etilgan.
“Yil yakuniga qadar yana 360 dona katta va o‘rta sig‘imli avtobuslar xarid qilinishi va poytaxt ko‘chalarida harakatlanuvchi avtobus yo‘nalishlarida tasarruf etilishini inobatga olib, oraliq intervali qisqa va belgilangan reja asosida jadvallar soni to‘liq bo‘lgan avtobus yo‘nalishlarida mazkur tartib qoida joriy etib borilishini ma’lum qilamiz”, — deyiladi xabarda.
Eslatib o‘tamiz, 2022-yilning may oyigacha Toshkent avtobuslari konduktor ishtirokisiz naqd to‘lovni onlayn qayd qilish tizimi bilan jihozlanadi. Ta’kidlanishicha, xizmat ko‘rsatish sifatidan kelib chiqqan holda jamoat transportini moliyalashtirishning yangi tizimiga o‘tish prezident qarori bilan ko‘zda tutilgan.
Izoh (0)