Қашқадарё вилоятининг Қарши шаҳрида такси ҳайдовчилари асосий қатнов йўлини тўсиб қўйди. Бу эса автомобиллар ҳаракатига халал берган.
«Дарё» билан суҳбатда бўлган қашқадарёлик блогер Мақсуд Музаффаровнинг айтишича, Қарши шаҳридаги асосий йўл — Ислом Каримов кўчасида ҳаракатланиб, Ерқўрғонга одам ташувчи такси ҳайдовчилари хавфсизлик камари тақмасдан ҳаракатлангани учун ёзилган жарималардан норози бўлган.
Ҳайдовчиларнинг блогер Мақсуд Музаффаровга йўллаган видеосига кўра, улар хавфсизлик камарини тақмай ҳаракатлангани учун ёзилган жаримадан норози бўлиб, буни бекор қилиш тараддудига тушган. Ва шу боис, йўлларни тўсиб, норозилигини билдирган.
Вилоят ИИБ ахборот хизмати раҳбари Жавлон Бахтиевнинг «Дарё»га маълум қилишича, Қарши шаҳрининг Ислом Каримов кўчасидаги «Соҳил бўйи» қисмида камера ўрнатилган бўлиб, мазкур камера 2022 йилнинг 1 май кунидан бошлаб хавфсизлик камарини тақмай ҳаракатланаётган ҳайдовчиларни расмга олган. Ва шу фотофактларга кўра, такси ҳайдовчиларига ҳам маъмурий баённомалар расмийлаштирилган.
«Айнан шунинг учун автовокзал томонда 100 га яқин ҳайдовчи тўпланиб, вилоят ҳокимлигига кирмоқчи экан. Майли, киришсин, зора шу баҳонада янги тартибдан хабардор бўлиб қолишса», — дейди воқеа ҳақида ёзган Қитмир мухбир.
Блогер ва ҳуқуқшунос Хушнудбек Худойбердиевнинг эслатишича, янги тартибга кўра 2022 йилнинг 1 май кунидан бошлаб хавфсизлик камарини тақмай ҳаракатланган нафақат ҳайдовчиларга, олд ўриндиқдаги йўловчиларга ҳам 135 минг сўмдан жарима солиниши мумкин.
«Мазкур камера олд ўриндиқда хавфсизлик камарини тақмай ҳаракатланган йўловчига жарима ёзмаган. Бу тартиб ҳозирча фақат ҳайдовчилар учун татбиқ қилинмоқда», — дейди Жавлон Бахтиев.
Изоҳ (0)