AQSH hukumati Shimoliy Koreyaga koronavirusga qarshi kurashda vaksinalar bilan yordam berishga tayyor, buning uchun KXDR rasmiylariga mamlakatni yadrosizlantirish sharti qo‘yilmaydi. Bu haqda AQSH Davlat kotibining Sharqiy Osiyo va Tinch okeani masalalari bo‘yicha yordamchisi o‘rinbosari Mark Lambert ma’lum qildi.
“AQSHning pozitsiyasi Pxenyandagi vaziyat keskin tus olgan paytda ham o‘zgarishsiz qolmoqda. Biz KXDRga insonparvarlik yordami va COVID-19 bilan bog‘liq yordam, jumladan, mRNK vaksinalarini yetkazib berishni qo‘llab-quvvatlashda davom etamiz. Biz hamisha insonparvarlik yordamini Koreya yarimorolini to‘liq yadrosizlantirish yo‘lida olg‘a siljish bilan bog‘liq bo‘lmagan alohida masala sifatida ko‘rib kelganmiz”, — dedi diplomat brifingda.
Avval ham AQSH Shimoliy Koreyaga koronavirusga qarshi kurashda yordam berishga tayyorligini ma’lum qilgandi, biroq KXDR bu taklifni nosamimiy deb atagan.
Lambertning so‘zlariga ko‘ra, Qo‘shma Shtatlar koronavirusning qaytadan avj olishi Shimoliy Koreya xalqiga, mamlakat iqtisodiyotiga va “oziq-ovqat bilan bog‘liq shusiz ham og‘ir vaziyat”ga ta’sir qilishidan xavotirda.
“Biz koronavirusning avj olishi va KXDRning unga munosabati Koreya yarimoroli hamda mintaqadagi barqarorlik va xavfsizlikka ta’sir qilishi mumkinligidan xavotirdamiz”, — dedi Davlat kotibi yordamchisining o‘rinbosari.
Oxirgi 24 soat ichida Shimoliy Koreyada 115 mingdan ortiq odamda yuqori harorat qayd etilgan. Ushbu odamlarning qanchasi COVID-19 bilan kasallangani haqida aniq ma’lumotlar berilmagan. Shimoliy Koreya yetakchisi Kim Chen Inning aytishicha, koronavirus tarqalishi KXDR tashkil topganidan beri eng katta zarba bo‘ldi. Uning farmoniga ko‘ra, mamlakatda karantin joriy qilingan.
Izoh (0)