АҚШ ҳукумати Шимолий Кореяга коронавирусга қарши курашда вакциналар билан ёрдам беришга тайёр, бунинг учун КХДР расмийларига мамлакатни ядросизлантириш шарти қўйилмайди. Бу ҳақда АҚШ Давлат котибининг Шарқий Осиё ва Тинч океани масалалари бўйича ёрдамчиси ўринбосари Марк Ламберт маълум қилди.
«АҚШнинг позицияси Пхеньяндаги вазият кескин тус олган пайтда ҳам ўзгаришсиз қолмоқда. Биз КХДРга инсонпарварлик ёрдами ва COVID-19 билан боғлиқ ёрдам, жумладан, мРНК вакциналарини етказиб беришни қўллаб-қувватлашда давом этамиз. Биз ҳамиша инсонпарварлик ёрдамини Корея яриморолини тўлиқ ядросизлантириш йўлида олға силжиш билан боғлиқ бўлмаган алоҳида масала сифатида кўриб келганмиз», — деди дипломат брифингда.
Аввал ҳам АҚШ Шимолий Кореяга коронавирусга қарши курашда ёрдам беришга тайёрлигини маълум қилганди, бироқ КХДР бу таклифни носамимий деб атаган.
Ламбертнинг сўзларига кўра, Қўшма Штатлар коронавируснинг қайтадан авж олиши Шимолий Корея халқига, мамлакат иқтисодиётига ва «озиқ-овқат билан боғлиқ шусиз ҳам оғир вазият»га таъсир қилишидан хавотирда.
«Биз коронавируснинг авж олиши ва КХДРнинг унга муносабати Корея яримороли ҳамда минтақадаги барқарорлик ва хавфсизликка таъсир қилиши мумкинлигидан хавотирдамиз», — деди Давлат котиби ёрдамчисининг ўринбосари.
Охирги 24 соат ичида Шимолий Кореяда 115 мингдан ортиқ одамда юқори ҳарорат қайд этилган. Ушбу одамларнинг қанчаси COVID-19 билан касаллангани ҳақида аниқ маълумотлар берилмаган. Шимолий Корея етакчиси Ким Чен Иннинг айтишича, коронавирус тарқалиши КХДР ташкил топганидан бери энг катта зарба бўлди. Унинг фармонига кўра, мамлакатда карантин жорий қилинган.
Изоҳ (0)