Afg‘onistonda sodir etilgan qator portlashlarda 14 kishi halok bo‘ldi

Afg‘oniston poytaxti Kobul va mamlakat shimolidagi Mozori Sharif shahrida ro‘y bergan to‘rtta portlashda kamida 14 kishi halok bo‘ldi, yana 32 kishi yaralandi. Bu haqda Msn nashri xabar berdi.

Nashrning aniqlik kiritishicha, Mozori Sharif shahrida mikroavtobuslarga o‘rnatilgan uchta bombaning portlashi oqibatida 9 kishi halok bo‘lgan.

“Bombalar shaharning turli qismlarida uchta mikroavtobusga o‘rnatilgan”, — dedi Balx viloyati politsiyasi matbuot kotibi Asif Vaziriy jurnalistlarga. U yana 15 kishi jarohat olganini ma’lum qildi. Balx sog‘liqni saqlash boshqarmasi boshlig‘i Najibulla Tavananing aytishicha, qurbonlar orasida uch nafar ayol ham bor.

Shuningdek, 25-may kuni kechqurun Kobuldagi masjidda portlash sodir etilgan va kamida besh kishi halok bo‘lgan, 17 kishi yaralangan.

Hodisadan bir necha soat o‘tib, IShID guruhi portlashlar uchun javobgarlikni zimmasiga olgan.

30-aprel kuni Kobuldagi masjidda portlash yuz berib, oqibatda 50 nafardan ziyod odam halok bo‘lgandi. 29-aprel kuni esa mamlakat shimolidagi Balx viloyatida portlash sodir bo‘lgan va 10 nafar odamni hayotdan olib ketgandi. Shuningdek, undan avvalroq ketma-ket yuz bergan bir nechta portlashlar tufayli 100 nafarga yaqin odam yaralangan, 40 nafar kishi halok bo‘lgandi.