24-may kuni Investitsiyalar va tashqi savdo vazirligida O‘zbekiston va Xitoy hukumatlari o‘rtasida Texnik-iqtisodiy hamkorlik to‘g‘risidagi bitimni imzolash marosimi bo‘lib o‘tdi. Bu haqda vazirlik matbuot xizmati xabar berdi.
Hujjat O‘zbekiston Investitsiyalar va tashqi savdo vazirining birinchi o‘rinbosari Aziz Voitov va Xitoyning O‘zbekistondagi favqulodda va muxtor elchisi Szyan Yan tomonidan imzolangan.
Bitim Xitoy hukumati tomonidan O‘zbekistonda ijtimoiy ahamiyatga molik loyihalarni birgalikda amalga oshirish uchun 250 million yuan (37,5 million dollar) miqdorida beg‘araz yordam ko‘rsatishni nazarda tutadi.
“Bugungi kungacha ikki mamlakat o‘rtasidagi texnik-iqtisodiy hamkorlik doirasida sog‘liqni saqlash, ta’lim, qishloq va suv xo‘jaligi, madaniyat, transport va boshqa sohalarda loyihalar amalga oshirildi”, — deyiladi xabarda.
Eslatib o‘tamiz, aprel boshlarida O‘zbekiston transport vaziri Ilhom Mahkamov Xitoyning O‘zbekistondagi elchisi Szyan Yan xonim bilan uchrashib, Xitoy—Qirg‘iziston—O‘zbekiston temiryo‘li qurilishi loyihasini muhokama qilgandi.
Izoh (0)