Ijtimoiy tarmoqlarda Toshkentda qaynona kelinini o‘ldirgani haqida xabarlar tarqaldi. Bosh prokuratura matbuot xizmati holatga munosabat bildirib, gumonlanuvchiga nisbatan qamoqqa olish ehtiyot chorasi qo‘llanilganini ma’lum qildi.

Aniqlanishicha, 5-may kuni soat 10:00 larda Toshkent tumani, Chinor 7-tor ko‘chasida yashovchi 67 yoshli ayol kelini (1985-yilda tug‘ilgan, 3 nafar farzandi bor) bilan o‘zaro oilaviy kelishmovchilik sababli janjallashgan. Janjal davomida ayol oshxona pichog‘i bilan kelinining chap ko‘krak qismiga bir marotaba zarba bergan. Olgan tan jarohati tufayli jabrlanuvchi shifoxonaga yotqizilgan.

Shifokorlar tomonidan ko‘rsatilgan zarur tibbiy muolajalarga qaramasdan 9-may kuni kelin shifoxonada vafot etgan.

Mazkur holat yuzasidan Jinoyat kodeksining 104-moddasi (qasddan badanga og‘ir shikast yetkazish) bilan jinoyat ishi qo‘zg‘atilgan.

Ayblanuvchi ayolga nisbatan qamoqqa olish ehtiyot chorasi qo‘llanilgan. Toshkent tumani IIB Tergov bo‘limi tomonidan tergov harakatlari olib borilmoqda.

Bundan oldin Farg‘onada 45 yoshli erkak xotinini bolta bilan chopib tashlagani, Sirdaryoda xotinini farzandining oldida 14 marta pichoqlab o‘ldirgan erkak 17 yilga qamalgani, Buxoroda qo‘shni ayolni o‘roq bilan jarohatlab o‘ldirgan shaxs qo‘lga olingani to‘g‘risida xabar berilgandi.