Тошкент вилоятида икки ёшли қизини айлантиришга олиб кетиш учун собиқ рафиқасининг олдига келган эркак уни калтаклаб, тан жароҳатлари етказди. Бу ҳақда Telegram’даги «Немолчи» лойиҳаси хабар берди.
Маълум қилинишича, собиқ эр-хотин ўртасидаги можаро боланинг кийимлари сабаб юзага келган. Эркак собиқ хотинидан қизига ўзи олиб берган кийимларни кийдиришни талаб қилган. Аёл кийимларни қидиришини айтиб, эшикни ёпаётганида эркак қизчани унинг қўлидан юлиб олиб, бир неча бор урган. Шундан сўнг, аёлни подъездга олиб чиқиб, зинадан итариб юборган ва подъезд эшигига урган.
Маълумотларга кўра, ҳолат юзасидан гумонланувчи 31 ёшли Т.Б.га нисбатан Жиноят кодексининг 109-моддаси (қасддан баданга енгил шикаст етказиш) билан жиноят иши қўзғатилган.
Ушбу моддага кўра, соғлиқнинг қисқа вақт, яъни олти кундан ортиқ, аммо йигирма бир кундан кўп бўлмаган муддатга ёмонлашувига ёки умумий меҳнат қобилиятининг унча узоқ бўлмаган муддатга йўқотилишига сабаб бўлган қасддан баданга енгил шикаст етказиш — базавий ҳисоблаш миқдорининг 25 бараваридан 50 бараваригача миқдорда жарима ёки 2 йилгача ахлоқ тузатиш ишлари ёхуд 1 йилгача озодликни чеклаш ёки бир йилгача озодликдан маҳрум қилиш билан жазоланади.
Аввалроқ Андижонда 2022 йилнинг тўрт ойи давомида 1221 нафар аёлга ҳимоя ордери берилгани, Қашқадарёда эркак аёли ва ўғлини ўзининг 3 нафар ака-укаси билан биргалашиб калтаклагани тўғрисида хабар берилганди.
Изоҳ (0)