Dunyo “yadroviy tusdagi” yangi sovuq urush va ekstremal millatchilikning kuchayishi xavfiga duch kelmoqda. Bu haqda Birlashgan Millatlar Tashkilotining Bosh kotibi Antoniu Guterrish Seton-Xoll universiteti (Nyu-Jersi shtati) bitiruvchilari oldida so‘zlagan nutqida aytib o‘tdi.
“Yaqin Sharqdan jiddiy yadroviy tusga ega yangi sovuq urush tahdidigacha, terrorizm va azaliy noroziliklar tufayli yuzaga kelayotgan ichki nizolardan tortib, xalqaro yechimlar har doim milliy manfaatlar uchun eng yaxshi ekani haqidagi asosiy haqiqatni e’tiborsiz qoldiradigan o‘ta millatchilikning o‘sishigacha — bu muammolarning har biri dunyomizning bo‘linishiga yana bir ishora bo‘lmoqda”, — dedi u
Guterrish dunyoga xavf solayotgan boshqa tahdidlar qatorida Ukrainadagi urush, iqlim o‘zgarishi, ijtimoiy tengsizlikning kuchayishi, ochlik va kasalliklarning tarqalishini tilga oldi.
“BMT Bosh kotibi sifatida shuni aytishim kerakki, siz xavf-xatarlarga to‘la dunyoga qadam qo‘ymoqdasiz. Biz o‘nlab yillar davomida kuzatilmagan ko‘lamdagi to‘qnashuv va bo‘linishlarga duch kelyapmiz”, — dedi u.
Shuningdek, amerikalik milliarder Jorj Soros Rossiyaning Ukrainadagi bosqini Uchinchi jahon urushining boshlanishi bo‘lishi mumkinligini aytdi.
“Bosqin uchinchi jahon urushining boshlanishi bo‘lishi, bizning sivilizatsiyamiz esa undan omon qolmasligi mumkin. Sivilizatsiyamizni saqlab qolishning yagona yo‘li — Putinni imkon qadar tezroq mag‘lub etishdir” — dedi Soros Shveysariyadagi Jahon iqtisodiy forumida.
Dunyoning eng yirik yadroviy davlatlari — Rossiya va AQSH (mos ravishda 6255 va 5550 ta jangovar kallakka ega) o‘rtasidagi munosabatlar Rossiyaning Ukrainadagi bosqini fonida keskinlashdi. Rossiya prezidenti Vladimir Putin o‘z maqsadlarini qo‘shni davlatni “demilitarizatsiya va denasifikatsiyalash” zarurati bilan izohladi. Shuningdek, u Ukrainadagi “maxsus operatsiya” Rossiya uchun G‘arbning mamlakat hududiga bo‘lgan agressiyasini oldini olishning yagona yo‘li ekanini ta’kidladi.
Rossiya bosqiniga javoban Ukraina harbiy holat e’lon qildi, G‘arb davlatlari, jumladan AQSH ham Moskvaga qarshi sanksiyalar joriy qilib, Kiyevga qurol yetkazib berishni boshladi.
Aprel oyi o‘rtalarida AQSHning Estoniyadagi Muvaqqat ishlar vakili Brayan Roraff AQSH Yevropaga doimiy ravishda qo‘shin kiritilishini istisno qilmasligini aytdi. Uning so‘zlariga ko‘ra, qit’adagi AQSH qo‘shinlari soni 80 mingdan 120 ming kishigacha oshgan va mamlakat xavfsizlikni mustahkamlash uchun qo‘shimcha harbiy kuchlar joylashtirilishi mumkin.
Kremlning ta’kidlashicha, G‘arb sharqiy qanotda “kuchli musht” va kuchli mudofaa harbiy infratuzilmasini yaratgan. Rossiya prezidenti matbuot kotibi Dmitriy Peskovning so‘zlariga ko‘ra, bunga javoban Vladimir Putin mudofaa vaziri Sergey Shoyguga g‘arbiy qanotni mustahkamlash bo‘yicha takliflar tayyorlash va kiritishni topshirgan.
Izoh (0)