Rossiyaning Jenevadagi BMT qoshidagi doimiy vakolatxonasi maslahatchisi Boris Bondaryev Rossiyaning Ukrainaga bostirib kirishiga norozilik belgisi sifatida iste’fo berdi, deb yozadi Meduza.
Qariyb 20 yil diplomat bo‘lib ishlagan Bondaryev o‘z qarorini hamkasblariga atalgan maktubda izohlab berdi, uning nusxasini Twitter’da UN Watch huquqni himoya qilish tashkiloti ijrochi direktori Gillel Noyyer e’lon qildi.
O‘z xatida Bondaryev, xususan, faoliyati davomida Rossiya tashqi siyosatidagi turli burilishlarni ko‘rganini, ammo Rossiya qo‘shinlari 24-fevral kuni Ukrainaga bostirib kirgach, “o‘z yurti uchun har qachongidan ko‘proq uyalgani” haqida yozgan.
“Putin tomonidan Ukrainaga qarshi, aslida esa butun G‘arb dunyosiga qarshi boshlangan tajovuzkor urush — nafaqat ukraina xalqiga qarshi jinoyat, balki, ehtimol, Rossiya xalqiga qarshi ham eng jiddiy jinoyatdir”, — deb hisoblaydi Bondaryev. “Mamlakatimizda gullab-yashnovchi va erkin jamiyat yaratish uchun barcha umidlar va istiqbollar katta Z harfi bilan chizib tashlandi”, — dedi u.
Bondaryev bir nechta OAVlarga intervyu berishga ham ulgurdi. Xususan, Britaniyaning The Telegraph nashri bilan suhbatda aytishicha, Putin Ukrainaga bostirib kirish haqida buyruq berganidan keyin chet elda Rossiyaga vakillik qilish jarayonida “nafrat”ni his qilgan. Shuningdek, yadro quroli tarqalmasligi masalalari bilan shug‘ullangan Bondarevni Rossiya rasmiy shaxslarining bunday qurol-yaroqlarni qo‘llash haqida qanchalik yengiltaklik bilan gapira boshlagani “dahshatga solgan”.
Bondaryevning so‘zlariga ko‘ra, u urush boshlanganidan keyin iste’fo berishga qaror qilgan yagona rossiyalik diplomat emas. Uning ba’zi tanishlari tashqi ishlar vazirligidan jimgina ishdan bo‘shab ketgan. Shuningdek, omma oldida urush haqidagi safsatalarni gapiradiganlar ham shaxsiy suhbatlar chog‘ida Ukrainadagi shafqatsiz urushdan va TIV aniq-ravshan harbiy jinoyatlarga bahonalar o‘ylab topish bilan shug‘ullanayotganidan qattiq ta’sirlanganini tan oladi. “Rossiya prezidenti bu mamlakatdagi yagona ‘diplomat’ bo‘lsa, u hammadan yaxshiroq bilsa, bizning ishlashimizdan nima ma’no?” — dedi Bondaryev.
BBC Russia nashriga bergan intervyusida Bondaryev uni sotqin deb atashlaridan qo‘rqish-qo‘rqmasligi haqidagi savolga: “Ular meni allaqachon shunday deb hisoblashsa kerak, deb o‘ylayman”, — deya javob berdi.
Keyinroq Rossiya prezidenti matbuot kotibi Dmitriy Peskov Bondaryev “Rossiya jamiyatining hamjihat fikriga qarshi chiqqani”ni ma’lum qildi.
“Bu yerda, menimcha, faqat bitta narsani aytish mumkin, Bondaryev endi biz bilan emas, balki bizga qarshidir”, — dedi u jurnalistlarning iste’fo bergan diplomat haqidagi savollariga javoban.
“Bizga qarshi” nima degani, deb berilgan savolga Peskov shunday javob qildi: “U Rossiya rahbariyati xatti-harakatlarini qoralayapti, Rossiya rahbariyatining harakatlari esa mamlakatimizning deyarli barcha aholisi tomonidan qo‘llab-quvvatlanmoqda. Demak, bu janob mamlakatimizning umumiy hamjihat fikriga qarshi chiqqan”.
Izoh (0)