AQSHda sobiq prezident kichik Jorj Bushga suiqasd rejalashtirgan iroqlik shaxs qo‘lga olindi

ISHIDga aloqador deb taxmin qilinayotgan asli iroqlik shaxs AQSHning 43-prezidenti kichik Jorj Bushga suiqasd qilishni rejalashtirgan. Bu haqda FQB hujjatlariga tayanib, Forbes va ABC News xabar bermoqda.

Gumonlanuvchi — Ogayo shtati Kolumbus shahrida yashovchi 52 yoshli Shahob Ahmad Shahob bo‘lib, u AQSHga 2020-yilda boshpana so‘rab ariza berish orqali kelgan. U 24-may kuni qo‘lga olindi.

FQB ma’lumotlariga ko‘ra, gumonlanuvchi 2021-yildan buyon Bushga suiqasd rejalashtirib kelgan. U Dallasda prezidentni kuzatish, siyosatchi qarorgohi yaqinida videotasvirlar olish orqali jinoyatga tayyorlangan, shuningdek, suiqasdning boshqa ishtirokchilari — o‘zining Iroq, Turkiya, Misr va Daniyadagi yurtdoshlarini Meksika orqali AQSHga yo‘naltirishni rejalashtirgan.

FQB gumonlanuvchining WhatsApp’dagi yozishmalarini kuzatish orqali va ikki informator bergan ma’lumotlar sharofati bilan suiqasd oldini olishga muvaffaq bo‘lgan. Ulardan biriga Shahob “Al-Rayod” bo‘linmasining bir qismi ekanini aytgan, uni esa Saddam Husaynning sobiq uchuvchisi boshqargan. Bundan tashqari, informatorning so‘zlariga ko‘ra, gumonlanuvchi “Baas” (arab sotsialistik tiklanish) partiyasi va ISHID chatlariga kirgan.

Shahob o‘zining Bushni o‘ldirish niyatini AQSH bostirib kirganidan keyin ko‘plab iroqliklar halok bo‘lishi, mamlakat esa parchalanib ketishiga uni javobgar deb hisoblashi bilan izohladi.

Kichik Jorj Bush 2001—2009-yillarda AQSH prezidenti lavozimini egallagan. 2003-yilda Amerika Iroqqa bostirib kirgan. Buning rasmiy sababi sifatida Iroq bosh vaziri Saddam Husaynning terrorchilar bilan aloqadorligi aytilgan. Husayn rejimi ag‘darilgach, Amerika qo‘shinlari “Al-Qoida” va ISHIDga qarshi mahalliy operatsiyalar o‘tkazish bilan shug‘ullangan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.