Vengriya Ukrainadagi urush tufayli favqulodda holat tartibini e’lon qildi

Vengriya bosh vaziri Viktor Orban Ukrainada davom etayotgan urush sabab mamlakatda favqulodda holat tartibini e’lon qildi, deya xabar bergan Bloomberg.

Orbanning so‘zlariga ko‘ra mazkur chora hukumatga manyovrlar amalga oshirish va Ukrainadagi vaziyat bo‘yicha voqea-hodisalarga tezkor munosabat bildirish imkonini beradi.

“Urush va Bryussel sanksiyalari katta iqtisodiy yo‘qotishlar va narxlarning o‘sishiga olib kelayotganini ko‘ryapmiz. Dunyo iqtisodiy inqiroz yoqasiga kelib qolgan. Vengriya hukumati mazkur vaziyat tufayli, konstitutsiyadagi vakolatidan kelib chiqib 25-maydan boshlab favqulodda holat tartibini e’lon qildi”, — deya Ukrainadagi urush mamlakatning energetik va iqtisodiy xavfsizligiga tahdid ekanligini qayd etgan Vengriya bosh vaziri.

Yaqin vaqt ichida Vengriya hukumati tomonidan favqulodda holat tartibining dastlab choralari haqida axborot berilishi kutilmoqda.

Vengriya Yevroittifoq tomonidan oltinchi sanksiyalar paketi loyihasi doirasida Rossiya neftiga nisbatan keskin chora ya’ni embargo qo‘llashga qarshi chiqmoqda. Mamlakat vakillari mazkur taqiq Vegnriya iqtisodiyotiga jiddiy zarar yetkazishidan xavotirdaligini bildirgan.

Yevropa ittifoqi Rossiya neftidan voz kechilgach Vengriya va yana bir qator mamlakatlarga qo‘shimcha kompensatsiya taqdim etishi taxmin qilingan. Financial Times nashrining yozishicha YI raisi Sharl Mishelga yozgan xatida Orban kelasi haftada o‘tadigan mamlakatlar rahbarlari ishtirokidagi uchrashuvda neft embargosi masalasini muhokama qilmaslikka chaqirgan. Vengriya bosh vaziri mamlakatning Bryussel tomonidan Budapeshtga ko‘rsatiladigan moliyaviy yordam haqida batafsil axboroti taqdim etilmasa mamlakatning Rossiyaga nisbatan neft embargosiga dosh bermasligini ta’kidlagan.