Дунё «ядровий тусдаги» янги совуқ уруш ва экстремал миллатчиликнинг кучайиши хавфига дуч келмоқда. Бу ҳақда Бирлашган Миллатлар Ташкилотининг Бош котиби Антониу Гутерриш Сетон-Холл университети (Нью-Жерси штати) битирувчилари олдида сўзлаган нутқида айтиб ўтди.
«Яқин Шарқдан жиддий ядровий тусга эга янги совуқ уруш таҳдидигача, терроризм ва азалий норозиликлар туфайли юзага келаётган ички низолардан тортиб, халқаро ечимлар ҳар доим миллий манфаатлар учун энг яхши экани ҳақидаги асосий ҳақиқатни эътиборсиз қолдирадиган ўта миллатчиликнинг ўсишигача — бу муаммоларнинг ҳар бири дунёмизнинг бўлинишига яна бир ишора бўлмоқда», — деди у
Гутерриш дунёга хавф солаётган бошқа таҳдидлар қаторида Украинадаги уруш, иқлим ўзгариши, ижтимоий тенгсизликнинг кучайиши, очлик ва касалликларнинг тарқалишини тилга олди.
«БМТ Бош котиби сифатида шуни айтишим керакки, сиз хавф-хатарларга тўла дунёга қадам қўймоқдасиз. Биз ўнлаб йиллар давомида кузатилмаган кўламдаги тўқнашув ва бўлинишларга дуч келяпмиз», — деди у.
Шунингдек, америкалик миллиардер Жорж Сорос Россиянинг Украинадаги босқини Учинчи жаҳон урушининг бошланиши бўлиши мумкинлигини айтди.
«Босқин учинчи жаҳон урушининг бошланиши бўлиши, бизнинг цивилизациямиз эса ундан омон қолмаслиги мумкин. Цивилизациямизни сақлаб қолишнинг ягона йўли — Путинни имкон қадар тезроқ мағлуб этишдир» — деди Сорос Швейцариядаги Жаҳон иқтисодий форумида.
Дунёнинг энг йирик ядровий давлатлари — Россия ва АҚШ (мос равишда 6255 ва 5550 та жанговар каллакка эга) ўртасидаги муносабатлар Россиянинг Украинадаги босқини фонида кескинлашди. Россия президенти Владимир Путин ўз мақсадларини қўшни давлатни «демилитаризация ва денасификациялаш» зарурати билан изоҳлади. Шунингдек, у Украинадаги «махсус операция» Россия учун Ғарбнинг мамлакат ҳудудига бўлган агрессиясини олдини олишнинг ягона йўли эканини таъкидлади.
Россия босқинига жавобан Украина ҳарбий ҳолат эълон қилди, Ғарб давлатлари, жумладан АҚШ ҳам Москвага қарши санкциялар жорий қилиб, Киевга қурол етказиб беришни бошлади.
Апрель ойи ўрталарида АҚШнинг Эстониядаги Муваққат ишлар вакили Брайан Рорафф АҚШ Европага доимий равишда қўшин киритилишини истисно қилмаслигини айтди. Унинг сўзларига кўра, қитъадаги АҚШ қўшинлари сони 80 мингдан 120 минг кишигача ошган ва мамлакат хавфсизликни мустаҳкамлаш учун қўшимча ҳарбий кучлар жойлаштирилиши мумкин.
Кремлнинг таъкидлашича, Ғарб шарқий қанотда «кучли мушт» ва кучли мудофаа ҳарбий инфратузилмасини яратган. Россия президенти матбуот котиби Дмитрий Песковнинг сўзларига кўра, бунга жавобан Владимир Путин мудофаа вазири Сергей Шойгуга ғарбий қанотни мустаҳкамлаш бўйича таклифлар тайёрлаш ва киритишни топширган.
Изоҳ (0)