AQSH maktabidagi otishma qurbonlari soni 21 kishiga yetdi. Bayden qurol lobbisiga qarshi kurashishga chaqirdi

AQSHning Texas shtati Yuvald shahridagi boshlang‘ich maktabda sodir etilgan otishmada 18 nafar bola va uch nafar voyaga yetgan shaxs halok bo‘ldi. Bu haqda senator Roland Gutyerres ma’lum qildi, deb yozadi “RBK”.

Gumonlanuvchi maktabga kelishdan avval o‘z buvisiga o‘q uzgan, u tirik, ammo og‘ir ahvolda, deya qo‘shib qo‘ydi senator.

Ayni vaqtda jamoatchilik xavfsizligi departamenti ma’lumotlariga ko‘ra, otishma oqibatida 19 nafar o‘quvchi va ikki nafar katta yoshlilar halok bo‘lgan.

AQSH prezidenti Jo Bayden otishmadan keyin kongressga yo‘llagan murojaatida qurol lobbisiga qarshi kurashib, qurol bo‘yicha qonunchilikka qo‘shimcha cheklovlar kiritish zarurligini aytdi.

“Mamlakat sifatida biz qachon qurol lobbisiga qarshi chiqamiz, deb so‘rashimiz kerak. Men bundan charchadim. Biz harakatga o‘tishimiz kerak. Biz bu qirg‘inga ta’sir qila olmaymiz deb menga aytmang”, — dedi Bayden.

Shuningdek, prezident “ma’nosiz zo‘ravonlik harakatlari qurbonlari xotirasiga hurmat yuzasidan” Oq uyda, harbiy obyektlarda va davlat binolarida bayroqlarni tushirishni topshirdi.

Maktabdagi otishma haqida ilk xabarlar mahalliy vaqt bilan 24-may kuni 11:43 da (Toshkent vaqti bilan 21:43) kelib tushgandi. Hujumchi 18 yoshli yigit bo‘lib chiqdi, u politsiyachilar tomonidan qo‘lga olinish chog‘ida halok bo‘ldi.

Associated Press qayd etishicha, Yuvalddagi otishma qurbonlar soni bo‘yicha so‘nggi o‘n yildagi eng ommaviysi bo‘ldi. 2012-yil 14-dekabr kuni Konnektikut shtatidagi Sendi-Xuk maktabida yuz bergan otishmada 20 nafar bola va olti nafar katta yoshlilar halok bo‘lgandi.