АҚШнинг Техас штати Ювалд шаҳридаги бошланғич мактабда содир этилган отишмада 18 нафар бола ва уч нафар вояга етган шахс ҳалок бўлди. Бу ҳақда сенатор Роланд Гутеррес маълум қилди, деб ёзади «РБК».
Гумонланувчи мактабга келишдан аввал ўз бувисига ўқ узган, у тирик, аммо оғир аҳволда, дея қўшиб қўйди сенатор.
Айни вақтда жамоатчилик хавфсизлиги департаменти маълумотларига кўра, отишма оқибатида 19 нафар ўқувчи ва икки нафар катта ёшлилар ҳалок бўлган.
АҚШ президенти Жо Байден отишмадан кейин конгрессга йўллаган мурожаатида қурол лоббисига қарши курашиб, қурол бўйича қонунчиликка қўшимча чекловлар киритиш зарурлигини айтди.
«Мамлакат сифатида биз қачон қурол лоббисига қарши чиқамиз, деб сўрашимиз керак. Мен бундан чарчадим. Биз ҳаракатга ўтишимиз керак. Биз бу қирғинга таъсир қила олмаймиз деб менга айтманг», — деди Байден.
Шунингдек, президент «маъносиз зўравонлик ҳаракатлари қурбонлари хотирасига ҳурмат юзасидан» Оқ уйда, ҳарбий объектларда ва давлат биноларида байроқларни туширишни топширди.
Мактабдаги отишма ҳақида илк хабарлар маҳаллий вақт билан 24 май куни 11:43 да (Тошкент вақти билан 21:43) келиб тушганди. Ҳужумчи 18 ёшли йигит бўлиб чиқди, у полициячилар томонидан қўлга олиниш чоғида ҳалок бўлди.
Associated Press қайд этишича, Ювалддаги отишма қурбонлар сони бўйича сўнгги ўн йилдаги энг оммавийси бўлди. 2012 йил 14 декабрь куни Коннектикут штатидаги Сенди-Хук мактабида юз берган отишмада 20 нафар бола ва олти нафар катта ёшлилар ҳалок бўлганди.
Мавзуга доир:
- АҚШда 18 ёшли талаба машинада 300 км йўл босиб келиб, супермаркетда 10 кишини ўлдирди. У ҳужум қилганларнинг деярли ҳаммаси қора танли бўлган
- АҚШда мактаб автобуси ўққа тутилди. 15 ёшли ўқувчи ҳалок бўлди
- АҚШда портлаш таҳдиди туфайли учта университет эвакуация қилинди
- Ўзининг «худо» эканини англаган ва қонуний равишда ов милтиғи сотиб олган «оғир-босиқ» талаба. Қозондаги мактабга ҳужум ва ҳужумчининг ўзи ҳақида батафсил
Изоҳ (0)