Ijtimoiy tarmoqlarda Toshkent viloyati O‘rta Chirchiq tumanida Xalq bankiga tegishli Damas avtomobili va “Jiguli” bilan to‘qnashib ketgani aks etgan video tarqaldi. Yo‘l harakati xavfsizligi xizmati holat bo‘yicha ma’lumot berdi.
Qayd etilishicha, yo‘l-transport hodisasi 2021-yilning 13-oktabr kuni soat 10:30 larda O‘rta Chirchiq tumani hududidan o‘tgan Avangard—O‘rtasaroy avtomobil yo‘lining 5-kilometrida sodir bo‘lgan. Haydovchi B.T. boshqaruvida bo‘lgan Damas hamda haydovchi U.A. boshqaruvida bo‘lgan “Vaz-2106” avtomobillari ishtirokida to‘qnashuv sodir bo‘lgan.
YTH oqibatida yo‘lovchi Z.E. yengil tan jarohati olib shifoxonaga murojaat qilgan.
Holat yuzasidan tomonidan to‘plangan hujjatlar 2021-yil 27-oktabr kuni jinoyat ishlari bo‘yicha O‘rta Chirchiq tumani sudi tomonidan ko‘rib chiqilgan. Damas haydovchisi B.T. Ma’muriy javobgarlik to‘g‘risidagi kodeksning 133-moddasi (transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi)da nazarda tutilgan huquqbuzarlikni sodir etgan deb topilgan. Unga nisbatan BHMning uch baravari miqdorida jarima jazosi belgilangan.
Shuningdek, huquqbuzar B.T.dan Xalq banki O‘rta Chirchiq filiali foydasiga 19 million 186 ming 42 so‘m undirilishi belgilangan. Xalq banki O‘rta Chirchiq filialidan jabrlanuvchi A.A.ning foydasiga esa 7 million 773 ming 294 so‘m zarar undiriladi.
Avvalroq Namanganda 14 yoshli bola “Jiguli”da tengdoshini bosib ketib, uning o‘limiga sababchi bo‘lgani, Sirdaryoda Lacetti va Nexia to‘qnashuvi oqibatida 5 kishi vafot etgani, Toshkent viloyatida “Jiguli” va Cobalt to‘qnashuvida ikki kishi halok bo‘lgani, ulardan biri 1 yoshga ham to‘lmagani haqida xabar berilgan.
Izoh (0)