Prezidentning farmoyishi bilan Farg‘ona va Namangan viloyati soliq boshqarmalariga yangi rahbarlar tayinlandi. Bu haqda Davlat soliq qo‘mitasi xabar qildi.
Qayd etilishicha, Adhamjon Tillavoldiyev Farg‘ona viloyati davlat soliq boshqarmasi boshlig‘i etib tayinlangan. U 1965-yilda tug‘ilgan. 1986-yilda Marg‘ilon reja-iqtisod texnikumini, 1992-yilda Andijon iqtisodiyot va boshqaruv institutini tamomlagan. Soliq xizmatining I darajali maslahatchisi hisoblanadi.
Tillavoldiyev 2018-yildan buyon Namangan viloyati davlat soliq boshqarmasi boshlig‘i lavozimida ishlab kelayotgan edi.
Farg‘ona viloyati davlat soliq boshqarmasi boshlig‘i lavozimida ishlab kelgan Shukurulloxon Nisbatxonov Qashqadaryo viloyati davlat soliq boshqarmasi boshlig‘i etib tayinlangan edi.
Adham Tillavoldiyevdan bo‘shab qolgan Namangan viloyati davlat soliq boshqarmasi boshlig‘i lavozimiga esa Alisher Boyxanov tayinlangan.
U mazkur lavozimga tayinlangunga qadar Namangan viloyati davlat soliq boshqarmasi boshlig‘ining birinchi o‘rinbosari lavozimida faoliyat yuritib kelayotgan edi.
Boyxanov 1972-yilda tug‘ilgan. 1994-yilda Toshkent davlat iqtisodiyot universitetini, 2007-yilda O‘zbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.
Avvalroq Davlat soliq qo‘mitasi raisi Sherzod Kudbiyev Fiskal institut rektori etib tayinlangani, DSQ raisining birinchi o‘rinbosari Samarqand shahriga hokim bo‘lgani, Sherzod Kudbiyevga yangi o‘rinbosar tayinlangani haqida xabar berilgan.
Izoh (0)