Qatar JCh—2022 mezbonligidan mahrum bo‘ladimi? Iste’fodan so‘ng “portlagan” Kabayev, chet el ligasida chempion bo‘lgan 17-o‘zbekistonlik. O‘zbek futbol gazetalari 11 yil avval 24-mayda nimalar haqida yozgan?

Futbol – yildan yilga o‘zgarayotgan, takomillashib borayotgan, millionlar emas, balki milliardlar o‘yiniga aylanayotgan sport turi. Internet nashrlar rivojlanib, yangiliklar turli tarmoqlarda uzatilishidan avval barcha sohalarga qatori futbolga oid yangiliklar ham insonlarga televideniye, radio va gazeta-jurnallar orqali yetkazib berilgan.

Xo‘sh, 11 yil avval 24-may kuni o‘zbek futbol gazetalari nimalar haqida yozgan, mulohazalar qilgan, kimlar bilan intervyular uyushtirgan? Bularning barchasi “O‘zbek futboli gazetalari tarixi” ruknida e’lon qilib boriladi.

Avvalroq O‘zbekiston milliy terma jamoasining bo‘lajak o‘rtoqlik uchrashuvlari, jumladan, 4-iyun kuni Xitoyga qarshi o‘ynashi aytilgan, ammo “Interfutbol” gazetasining 24-may sonida berilgan xabarga ko‘ra, ushbu uchrashuv O‘FFning iltimosiga binoan bir kun keyinga ko‘chirildi.

Bunga nima sabab bo‘lgan degan savolga javob ham bir ajoyib – MTJ 1-iyun kuni Kiyevda Ukraina bilan o‘yin o‘tkazgan, endigi manzil esa Sharqiy Osiyo. Futbolchilarning charchab qolmasligi uchun murabbiylar tomonidan shunday fikrga kelingan. Kishini hayron qoldiradigani – ushbu holat yuzaga kelishini taxminan hamma, hech bo‘lmasa murabbiylar yaxshi anglagan. Ammo nega uchrashuv sanasi kelishilayotganda shu kabi faktorlar inobatga olinmagan, qiziq.

“Interfutbol” gazetasining 17-may kungi sonida O‘FFga FIFA vakillarining kelishi kutilayotgani va unda yollar o‘rtasida U-20 Jahon chempionatini O‘zbekistonda o‘tkazish masalasi muhokama qilinishi aytilgandi, gazetaning 24-maydagi sonida xabar berilishicha, FIFA vakillari O‘zbekistonga kelgan.

Delegatsiya O‘zbekistonda uch kun ish olib boradi. Borish reja qilingan manzillar: Toshkentdagi “Bunyodkor”, “Paxtakor”, “JAR” stadionlari, shuningdek, Qashqadaryodagi “Markaziy”, “Nasaf”, “B.Vafoyev” hamda bir qator mashg‘ulot maydonlari.

Ma’lumot uchun, o‘sha vaqtda FIFA O‘zbekistonga mundial mezbonligini bergan, biroq keyinchalik tashkilotning o‘zi O‘zbekistonni bu huquqdan mahrum qilgan.

“Toshkentda xalqaro turnir” sarlavhali xabarda gap futzal haqida ketmoqda. Ta’kidlanishicha, 28—31-may kunlari Ozarbayjon va Rossiyadan futzal klublari, Vyetnamning esa butun boshli terma jamoasi O‘zbekistondagi musobaqada ishtirok etadi. Mezbon mamlakat nomidan esa “Ardus” ishtirok etishi ko‘zda tutilgan.

Xabardagi e’tiborga molik jihat – O‘zbekiston mini-futbol assotsiatsiyasi tomonidan ushbu uchrashuvlarni tomosha qilish uchun “O‘zbekiston” sport majmuasiga kirish bepul. Aytish joizki, 11 yil o‘tib ham, bugungi kunda ayrim futzal turnirlariga kirish mutlaqo bepul.

2011-yilning 19-may kuni 40 yoshga to‘lgan “Paxtakor”ning vitse-prezidenti Samvel Babayan “Interfutbol”ga intervyu bergan. U jamoa tarkibining yoshartirilishi borasidagi savollarga ham javob berib o‘tgan.

Samvel Vyacheslavovich, shuningdek, qachon o‘zbek televideniyesi futbol translyatsiyalari uchun klublarga haq to‘lashi to‘g‘risidagi savolga ham javob berib, jumladan, shunday degan: “... birinchi navbatda, oliy ligada ko‘rsatilayotgan futbolning o‘rtacha sifati oshishi zarur... o‘ylashimcha, O‘FF bu yo‘nalishda ham katta ishlarni olib boryapti”.

Oradan 11 yil o‘tib ham ko‘rishimiz mumkin, TV translyatsiyalar uchun klublarga pul to‘lamaydi.

Oliy liga taqvimida esa yana o‘zgarishlar. Avvalroq, MTJning o‘rtoqlik uchrashuvlarida “Paxtakor” hamda “Bunyodkor” futbolchilari ishtirok etishi sabab O‘zbekiston chempionatining 10-turidan o‘rin olgan ushbu ikki jamoa o‘rtasidagi bahs 29-mayga qoldirilgani aytilgandi. Endi esa ushbu o‘yin noma’lum muddatga qoldirib yuborildi.

Shuningdek, “Paxtakor”ning O‘zbekiston kubogidagi “Andijon” qarshi uchrashuvining sanasi ham o‘zgartirilgan. Bunga sabab – O‘zbekiston MTJ hamda OTJning yig‘inlariga “paxtakorchi” futbolchilarning chaqiruv olishi. Bundan tashqari, taqvimdagi bir qator uchrashuvlarning ham sanasida o‘zgarishlar bo‘lganini ko‘rish mumkin.

Oliy liganing 8-turidan so‘ng “Qizilqum”da iste’fo yuz bergan, xo‘sh, murabbiy nega jamoadan ketdi? “Marat Kabayev ‘portladi’ ” sarlavhasi ostidagi intervyuda mutaxassis nima sababdan iste’foga chiqqani haqida to‘xtalib o‘tgan.

E’tiborga molik tomoni shundaki, klub rahbariyati o‘tgan yilgi qarzlarni 20-yanvardan so‘ng berishga va’da qilgan. “Yigitlar bilan hazillashib, 20-yanvardan keyinligi aniq, ammo qaysi yil, qaysi oy yoki qaysi kun ekanligi noaniq, deb kulishardik. Xullas, aprel oyida oz miqdorda pul oldik. Ochig‘i qanday yo‘l bilan berilgan noaniq. Chunki na bir qog‘ozga qo‘l qo‘ydik, na bir hujjatga”.

“Klublarimiz o‘z sohiblariga egami?” sarlavhasi ostidagi maqolada bugungi kunda ham aktual bo‘lgan mavzular ko‘tarilgan deyish mumkin.

Maqolada klublarning prezidenti bo‘lishi, reklama masalalari, shuningdek, jamoalarning atributlar orqali pul topishi haqida so‘z borgan.

Xorij futbolida nima gap? “Vest Hem” futbolchisi Demba Ba dastxat bermagani sabab muxlis bilan mushtlashib ketgan.

Voqeaning rivoji qiziq: muxlis futbolchidan dastxat so‘ragan, Ba esa unga charchaganini aytgan. Muxlis klub stadionidagi arzimagan loja uchun 60 ming funt sterling to‘lashini aytib yana dastxat so‘ragan, Ba yana bir bor rad etgan. Keyin esa muxlis hujumchini haqoratlagan, jumladan, irqchilikka yo‘g‘irilgan so‘zlar aytgan. Voqeaning yakuni esa mushtlashuv bilan yakun topgan.

“Bosh bilan zarba berish oqibati” sarlavhali xabarda aytilishicha, Meksika termasi posboni Xose de Xesus Korona mamlakat chempionati doirasidagi o‘yinda raqib jamoa murabbiyiga bosh bilan zarba bergan va ushbu holat TV kameralariga muhrlangan.

Oqibatda darvozabon KONKAKAF Oltin kubogi musobaqasida ishtirok etishdan mahrum bo‘lgan.

Qatar JCH—2022 mezbonligidan mahrum bo‘lishi — ko‘p gapirilgan mavzu. FIFA prezidenti Zepp Blatter ham bu borada gapirgan ekan.

Aytilishicha, Qatar tomoni mundialga mezbonlikni qo‘lga kiritish uchun FIFA ijroqo‘mining ayrim a’zolarini sotib olganlikda gumonlanmoqda. Mana, oradan 11 yil o‘tib ko‘rib turganimiz — 2022-yilgi Jahon Chempionati Qatarda bo‘lib o‘tadi.

25-maydan 8-iyunga qadar O‘zbekiston olimpiya terma jamoasi Avstriyadagi turnirda ishtirok etadi, xo‘sh, terma jamoa bosh murabbiyi Vadim Abramov turnir haqida qanday fikrda? “Futbol-Ekspress” gazetasida mutaxassis bilan suhbat e’lon qilingan.

Intervyudagi e’tiborga molik jihat – Vadim Karlenovich musobaqa g‘oliblari tashkilotchilar tomonidan rag‘batlantirilishi yoki yo‘qligini bilmaydi. “Lekin asosiysi bu emas. Birinchi navbatda bu turnir futbolchilarning o‘yin amaliyotini oshirishga katta yordam beradi. Gollandiya kabi Yevropaning kuchli jamoalariga qarshi maydonga tushish puldan afzal turadi deb hisoblayman”, – degan Abramov.

O‘zbekistonning to‘rt klubi – “Paxtakor”, “Bunyodkor”, “Nasaf” va “Sho‘rtan” bittadan uchrashuvda o‘yin diskini OFK qarorgohiga yubormagani uchun 5000 dollardan jarimaga tortilgandi. Gazetaning ushbu sonida chiqqan xabarga ko‘ra, disklar haqiqatdan OFKning Kuala-Lumpurdagi qarorgohiga yetib borgan.

Ta’kidlanishicha, disklar tushunmovchilik sabab boshqa bo‘limga o‘tib ketgan va endilikda OFK tartib-intizom qo‘mitasi o‘z qarorini qaytadan ko‘rib chiqadi.

Kiyevning “Arsenal” jamoasida o‘ynaydigan Maksim Shatskix O‘zbekiston terma jamoasining Ukrainaga qarshi o‘yini oldidan fikr bildirar ekan, jumladan, shunday deydi: “Hozirgi termamiz endi 2007-yilgi Kiyevga kelgan jamoa emas. Bu safar hammasi sal boshqacharoq bo‘ladi”.

“Yana 25 kundan keyin” sarlavhasi ostidagi xabarda O‘zbekiston o‘smirlar termasining Meksikadagi kichik mundialda ishtirok etishi haqida so‘z borgan.

Anzurda durang, Jeparov va Geynrixda mag‘lubiyat. Xo‘sh, legionerlarda nima gap?

Xitoy hamda Janubiy Koreyada faoliyat olib borayotgan Anzur Ismoilov, Eldor Magdeyev, Server Jeparov hamda Aleksandr Geynrix haqida.

Uzoq yillardan buyon Rossiyada faoliyat olib borayotgan Marat Bikmayevning aytishicha, futbolchini u yerda “ikkinchi Qosimov” deb chaqirishadi.

Bikmayev suhbat davomida terma jamoaning Ukraina va Xitoyga qarshi o‘yinlariga chaqiruv olmagani, agar taklif tushsa va jamoasi bilan muammo yuzaga kelmasa terma jamoa safida o‘ynashini aytib o‘tgan. Intervyuni tashkil qilgan jurnalistga ko‘ra, Bikmayev o‘rtoqlik o‘yinlarida ishtirok etadigan futbolchilar ro‘yxatiga kiritilgan.

2011-yili Ozarbayjonning “Neftchi”si milliy chempionatida g‘olib bo‘lgan. E’tiborli tomoni klub safida o‘zbekistonlik Bahodir Nasimov ham faoliyat yuritib keladi. Quyidagi ro‘yxatdan 1992-yildan 2011-yilga qadar xorijda chempion bo‘lgan o‘zbekistonlik futbolchilar haqida ma’lumot olishingiz mumkin:

“Barselona” klubining himoyachisi Erik Abidal mart oyida operatsiya qilingan. Shunga qaramasdan maydonga qayta olgan va jamoasining ayrim o‘yinlarida ishtirok etgan futbolchi bergan intervyusida hayotga yangicha nazar bilan qaray boshlaganini aytgan.

“Shuning uchun barcha mashinalarimni sotib yubordim. Futbolchilik kasbi senga juda yuksak hayot tarzini yuritish imkonini beradi. Masalan, juda tezyurar avtomobillarni xarid qilishing mumkin. Ammo shunga o‘xshash biron voqea sodir bo‘lganida sen o‘sha mashinalar hech qanday ahamiyatga ega emasligini tushunasan”, — degan futbolchi.