Қатар ЖЧ—2022 мезбонлигидан маҳрум бўладими? Истеъфодан сўнг «портлаган» Кабаев, чет эл лигасида чемпион бўлган 17-ўзбекистонлик. Ўзбек футбол газеталари 11 йил аввал 24 майда нималар ҳақида ёзган?

Футбол – йилдан йилга ўзгараётган, такомиллашиб бораётган, миллионлар эмас, балки миллиардлар ўйинига айланаётган спорт тури. Интернет нашрлар ривожланиб, янгиликлар турли тармоқларда узатилишидан аввал барча соҳаларга қатори футболга оид янгиликлар ҳам инсонларга телевидение, радио ва газета-журналлар орқали етказиб берилган.

Хўш, 11 йил аввал 24 май куни ўзбек футбол газеталари нималар ҳақида ёзган, мулоҳазалар қилган, кимлар билан интервьюлар уюштирган? Буларнинг барчаси «Ўзбек футболи газеталари тарихи» рукнида эълон қилиб борилади.

Аввалроқ Ўзбекистон миллий терма жамоасининг бўлажак ўртоқлик учрашувлари, жумладан, 4 июнь куни Хитойга қарши ўйнаши айтилган, аммо «Интерфутбол» газетасининг 24 май сонида берилган хабарга кўра, ушбу учрашув ЎФФнинг илтимосига биноан бир кун кейинга кўчирилди.

Бунга нима сабаб бўлган деган саволга жавоб ҳам бир ажойиб – МТЖ 1 июнь куни Киевда Украина билан ўйин ўтказган, эндиги манзил эса Шарқий Осиё. Футболчиларнинг чарчаб қолмаслиги учун мураббийлар томонидан шундай фикрга келинган. Кишини ҳайрон қолдирадигани – ушбу ҳолат юзага келишини тахминан ҳамма, ҳеч бўлмаса мураббийлар яхши англаган. Аммо нега учрашув санаси келишилаётганда шу каби факторлар инобатга олинмаган, қизиқ.

«Интерфутбол» газетасининг 17 май кунги сонида ЎФФга ФИФА вакилларининг келиши кутилаётгани ва унда ёллар ўртасида U-20 Жаҳон чемпионатини Ўзбекистонда ўтказиш масаласи муҳокама қилиниши айтилганди, газетанинг 24 майдаги сонида хабар берилишича, ФИФА вакиллари Ўзбекистонга келган.

Делегация Ўзбекистонда уч кун иш олиб боради. Бориш режа қилинган манзиллар: Тошкентдаги «Бунёдкор», «Пахтакор», «ЖАР» стадионлари, шунингдек, Қашқадарёдаги «Марказий», «Насаф», «Б.Вафоев» ҳамда бир қатор машғулот майдонлари.

Маълумот учун, ўша вақтда ФИФА Ўзбекистонга мундиал мезбонлигини берган, бироқ кейинчалик ташкилотнинг ўзи Ўзбекистонни бу ҳуқуқдан маҳрум қилган.

«Тошкентда халқаро турнир» сарлавҳали хабарда гап футзал ҳақида кетмоқда. Таъкидланишича, 28—31 май кунлари Озарбайжон ва Россиядан футзал клублари, Вьетнамнинг эса бутун бошли терма жамоаси Ўзбекистондаги мусобақада иштирок этади. Мезбон мамлакат номидан эса «Ардус» иштирок этиши кўзда тутилган.

Хабардаги эътиборга молик жиҳат – Ўзбекистон мини-футбол ассоциацияси томонидан ушбу учрашувларни томоша қилиш учун «Ўзбекистон» спорт мажмуасига кириш бепул. Айтиш жоизки, 11 йил ўтиб ҳам, бугунги кунда айрим футзал турнирларига кириш мутлақо бепул.

2011 йилнинг 19 май куни 40 ёшга тўлган «Пахтакор»нинг вице-президенти Самвел Бабаян «Интерфутбол»га интервью берган. У жамоа таркибининг ёшартирилиши борасидаги саволларга ҳам жавоб бериб ўтган.

Самвел Вячеславович, шунингдек, қачон ўзбек телевидениеси футбол трансляциялари учун клубларга ҳақ тўлаши тўғрисидаги саволга ҳам жавоб бериб, жумладан, шундай деган: «... биринчи навбатда, олий лигада кўрсатилаётган футболнинг ўртача сифати ошиши зарур... ўйлашимча, ЎФФ бу йўналишда ҳам катта ишларни олиб боряпти».

Орадан 11 йил ўтиб ҳам кўришимиз мумкин, ТВ трансляциялар учун клубларга пул тўламайди.

Олий лига тақвимида эса яна ўзгаришлар. Аввалроқ, МТЖнинг ўртоқлик учрашувларида «Пахтакор» ҳамда «Бунёдкор» футболчилари иштирок этиши сабаб Ўзбекистон чемпионатининг 10-туридан ўрин олган ушбу икки жамоа ўртасидаги баҳс 29 майга қолдирилгани айтилганди. Энди эса ушбу ўйин номаълум муддатга қолдириб юборилди.

Шунингдек, «Пахтакор»нинг Ўзбекистон кубогидаги «Андижон» қарши учрашувининг санаси ҳам ўзгартирилган. Бунга сабаб – Ўзбекистон МТЖ ҳамда ОТЖнинг йиғинларига «пахтакорчи» футболчиларнинг чақирув олиши. Бундан ташқари, тақвимдаги бир қатор учрашувларнинг ҳам санасида ўзгаришлар бўлганини кўриш мумкин.

Олий лиганинг 8-туридан сўнг «Қизилқум»да истеъфо юз берган, хўш, мураббий нега жамоадан кетди? «Марат Кабаев ‘портлади’» сарлавҳаси остидаги интервьюда мутахассис нима сабабдан истеъфога чиққани ҳақида тўхталиб ўтган.

Эътиборга молик томони шундаки, клуб раҳбарияти ўтган йилги қарзларни 20 январдан сўнг беришга ваъда қилган. «Йигитлар билан ҳазиллашиб, 20 январдан кейинлиги аниқ, аммо қайси йил, қайси ой ёки қайси кун эканлиги ноаниқ, деб кулишардик. Хуллас, апрель ойида оз миқдорда пул олдик. Очиғи қандай йўл билан берилган ноаниқ. Чунки на бир қоғозга қўл қўйдик, на бир ҳужжатга».

«Клубларимиз ўз соҳибларига эгами?» сарлавҳаси остидаги мақолада бугунги кунда ҳам актуал бўлган мавзулар кўтарилган дейиш мумкин.

Мақолада клубларнинг президенти бўлиши, реклама масалалари, шунингдек, жамоаларнинг атрибутлар орқали пул топиши ҳақида сўз борган.

Хориж футболида нима гап? «Вест Ҳэм» футболчиси Демба Ба дастхат бермагани сабаб мухлис билан муштлашиб кетган.

Воқеанинг ривожи қизиқ: мухлис футболчидан дастхат сўраган, Ба эса унга чарчаганини айтган. Мухлис клуб стадионидаги арзимаган ложа учун 60 минг фунт стерлинг тўлашини айтиб яна дастхат сўраган, Ба яна бир бор рад этган. Кейин эса мухлис ҳужумчини ҳақоратлаган, жумладан, ирқчиликка йўғирилган сўзлар айтган. Воқеанинг якуни эса муштлашув билан якун топган.

«Бош билан зарба бериш оқибати» сарлавҳали хабарда айтилишича, Мексика термаси посбони Хосе де Хесус Корона мамлакат чемпионати доирасидаги ўйинда рақиб жамоа мураббийига бош билан зарба берган ва ушбу ҳолат ТВ камераларига муҳрланган.

Оқибатда дарвозабон КОНКАКАФ Олтин кубоги мусобақасида иштирок этишдан маҳрум бўлган.

Қатар ЖЧ—2022 мезбонлигидан маҳрум бўлиши — кўп гапирилган мавзу. ФИФА президенти Зепп Блаттер ҳам бу борада гапирган экан.

Айтилишича, Қатар томони мундиалга мезбонликни қўлга киритиш учун ФИФА ижроқўмининг айрим аъзоларини сотиб олганликда гумонланмоқда. Мана, орадан 11 йил ўтиб кўриб турганимиз — 2022 йилги Жаҳон Чемпионати Қатарда бўлиб ўтади.

25 майдан 8 июнга қадар Ўзбекистон олимпия терма жамоаси Австриядаги турнирда иштирок этади, хўш, терма жамоа бош мураббийи Вадим Абрамов турнир ҳақида қандай фикрда? «Футбол-Экспресс» газетасида мутахассис билан суҳбат эълон қилинган.

Интервьюдаги эътиборга молик жиҳат – Вадим Карленович мусобақа ғолиблари ташкилотчилар томонидан рағбатлантирилиши ёки йўқлигини билмайди. «Лекин асосийси бу эмас. Биринчи навбатда бу турнир футболчиларнинг ўйин амалиётини оширишга катта ёрдам беради. Голландия каби Европанинг кучли жамоаларига қарши майдонга тушиш пулдан афзал туради деб ҳисоблайман», – деган Абрамов.

Ўзбекистоннинг тўрт клуби – «Пахтакор», «Бунёдкор», «Насаф» ва «Шўртан» биттадан учрашувда ўйин дискини ОФК қароргоҳига юбормагани учун 5000 доллардан жаримага тортилганди. Газетанинг ушбу сонида чиққан хабарга кўра, дисклар ҳақиқатдан ОФКнинг Куала-Лумпурдаги қароргоҳига етиб борган.

Таъкидланишича, дисклар тушунмовчилик сабаб бошқа бўлимга ўтиб кетган ва эндиликда ОФК тартиб-интизом қўмитаси ўз қарорини қайтадан кўриб чиқади.

Киевнинг «Арсенал» жамоасида ўйнайдиган Максим Шацких Ўзбекистон терма жамоасининг Украинага қарши ўйини олдидан фикр билдирар экан, жумладан, шундай дейди: «Ҳозирги термамиз энди 2007 йилги Киевга келган жамоа эмас. Бу сафар ҳаммаси сал бошқачароқ бўлади».

«Яна 25 кундан кейин» сарлавҳаси остидаги хабарда Ўзбекистон ўсмирлар термасининг Мексикадаги кичик мундиалда иштирок этиши ҳақида сўз борган.

Анзурда дуранг, Жепароқ ва Гейнрихда мағлубият. Хўш, легионерларда нима гап?

Хитой ҳамда Жанубий Кореяда фаолият олиб бораётган Анзур Исмоилов, Элдор Магдеев, Сервер Жепаров ҳамда Александр Гейнрих ҳақида.

Узоқ йиллардан буён Россияда фаолият олиб бораётган Марат Бикмаевнинг айтишича, футболчини у ерда «иккинчи Қосимов» деб чақиришади.

Бикмаев суҳбат давомида терма жамоанинг Украина ва Хитойга қарши ўйинларига чақирув олмагани, агар таклиф тушса ва жамоаси билан муаммо юзага келмаса терма жамоа сафида ўйнашини айтиб ўтган. Интервьюни ташкил қилган журналистга кўра, Бикмаев ўртоқлик ўйинларида иштирок этадиган футболчилар рўйхатига киритилган.

2011 йили Озарбайжоннинг «Нефтчи»си миллий чемпионатида ғолиб бўлган. Эътиборли томони клуб сафида ўзбекистонлик Баҳодир Насимов ҳам фаолият юритиб келади. Қуйидаги рўйхатдан 1992 йилдан 2011 йилга қадар хорижда чемпион бўлган ўзбекистонлик футболчилар ҳақида маълумот олишингиз мумкин:

«Барселона» клубининг ҳимоячиси Эрик Абидал март ойида операция қилинган. Шунга қарамасдан майдонга қайта олган ва жамоасининг айрим ўйинларида иштирок этган футболчи берган интервьюсида ҳаётга янгича назар билан қарай бошлаганини айтган.

«Шунинг учун барча машиналаримни сотиб юбордим. Футболчилик касби сенга жуда юксак ҳаёт тарзини юритиш имконини беради. Масалан, жуда тезюрар автомобилларни харид қилишинг мумкин. Аммо шунга ўхшаш бирон воқеа содир бўлганида сен ўша машиналар ҳеч қандай аҳамиятга эга эмаслигини тушунасан», — деган футболчи.