Afg‘onistonda “Tolibon” harakati talabidan so‘ng televideniyedagi ayol boshlovchilar yuzlarini yopdi. Bu haqda Euronews xabar bermoqda.
Farmon fazilat va illatlar, axborot va madaniyat vazirliklari tomonidan imzolangan. Dastlab ba’zi ayollar unga rioya qilishdan bosh tortgan, ammo ularni ishdan haydash yoki boshqa ishga o‘tkazish bilan qo‘rqitishgan.
“Toliblar shart qo‘yishidan avval biz ekranga chiqqanimizda ham, kundalik hayotda ham ro‘mol o‘rardik, chunki bu bizning musulmon ayol sifatidagi farzimiz. Biroq bunday yuzni yopib turadigan hijob turi, shunday niqobni taqish hech qanday asosga ega emas va bizning madaniyatimizga kirmaydi. Bizni niqob taqishga majburlashyapti, bu esa dasturlarimizni taqdim etish chog‘ida bizga muammolar tug‘dirishi mumkin”, — dedi boshlovchi Sonya Niyoziy.
Huquq himoyachilari toliblarning bu xatti-harakatlarini qoralamoqda. Ayol boshlovchilar keyingi chora-tadbirlar ularni efirdan to‘liq olib tashlash bo‘lishidan xavfsiramoqda.
May oyi boshida hukumat ayollar uchun ko‘chada va jamoat joylarida paranji kiyishni majburiy qilib qo‘ygan edi. Farmonga muvofiq, ayollar “o‘z oilasi a’zosi bo‘lmagan har qanday erkak oldida” yuzini yopishi kerak. 10-may kuni “Afg‘oniston vakolatli ayollari” huquqni himoya qilish harakati ishtirokchilari Kobulda norozilik aksiyasini o‘tkazdi. Ular yuzlarini ochib chiqib, ayollarning demokratik huquqlariga rioya etilishini talab qildi.
Mavzuga doir:
- BMT ekspertlari AQSHni Afg‘onistondagi ayollar hayotini yomonlashtirishda aybladi
- “Tolibon” qizlarning ta’lim olishiga qo‘yilgan taqiqni bekor qilmoqchi
- Afg‘onistondagi barcha davlat universitetlari yigit-qizlar uchun qayta ochildi
- “Tolibon” birinchi marta ayollarni rahbarlik lavozimlariga tayinladi
Izoh (0)