Афғонистонда «Толибон» ҳаракати талабидан сўнг телевидениедаги аёл бошловчилар юзларини ёпди. Бу ҳақда Euronews хабар бермоқда.
Фармон фазилат ва иллатлар, ахборот ва маданият вазирликлари томонидан имзоланган. Дастлаб баъзи аёллар унга риоя қилишдан бош тортган, аммо уларни ишдан ҳайдаш ёки бошқа ишга ўтказиш билан қўрқитишган.
«Толиблар шарт қўйишидан аввал биз экранга чиққанимизда ҳам, кундалик ҳаётда ҳам рўмол ўрардик, чунки бу бизнинг мусулмон аёл сифатидаги фарзимиз. Бироқ бундай юзни ёпиб турадиган ҳижоб тури, шундай ниқобни тақиш ҳеч қандай асосга эга эмас ва бизнинг маданиятимизга кирмайди. Бизни ниқоб тақишга мажбурлашяпти, бу эса дастурларимизни тақдим этиш чоғида бизга муаммолар туғдириши мумкин», — деди бошловчи Соня Ниёзий.
Ҳуқуқ ҳимоячилари толибларнинг бу хатти-ҳаракатларини қораламоқда. Аёл бошловчилар кейинги чора-тадбирлар уларни эфирдан тўлиқ олиб ташлаш бўлишидан хавфсирамоқда.
Май ойи бошида ҳукумат аёллар учун кўчада ва жамоат жойларида паранжи кийишни мажбурий қилиб қўйган эди. Фармонга мувофиқ, аёллар «ўз оиласи аъзоси бўлмаган ҳар қандай эркак олдида» юзини ёпиши керак. 10 май куни «Афғонистон ваколатли аёллари» ҳуқуқни ҳимоя қилиш ҳаракати иштирокчилари Кобулда норозилик акциясини ўтказди. Улар юзларини очиб чиқиб, аёлларнинг демократик ҳуқуқларига риоя этилишини талаб қилди.
Изоҳ (0)