Ukraina tinchlik muzokaralarini davom ettirish uchun o‘z shartini ma’lum qildi

Moskva va Kiyev o‘rtasidagi tinchlik muzokaralari Rossiya qo‘shinlari Ukraina hududini tark etganidan keyingina davom etishi mumkin, deya ma’lum qildi Ukraina prezidenti ofisi rahbari maslahatchisi Mixail Podolyak.

“Rossiya kuchlari mamlakatni tark etishi kerak, va shundan keyin tinchlik jarayoni qayta boshlanishi mumkin bo‘ladi”, — dedi Podolyak.

Uning so‘zlariga ko‘ra, Ukraina tomonidan yon bosishlar nizoga nuqta qo‘ymaydi, balki uni biroz vaqtga to‘xtatib turadi. Undan keyin, Podolyakning fikricha, “ruslar yangicha shiddat bilan o‘z qurollarini, jonli kuchlarini kuchaytira boshlaydi, o‘z xatolari ustida ishlaydi va yangi hujum boshlaydi”.

Maslahatchi G‘arbning o‘t ochishni zudlik bilan to‘xtatish haqidagi da’vatlarini “juda g‘alati” deb atadi, chunki u holda Rossiya kuchlari janubiy va sharqiy Ukrainadagi “bosib olingan” hududlarda qoladi, Kiyev esa buni qabul qilmaydi.

17-may kuni Germaniya kansleri Olaf Shols va Ukraina prezidenti Vladimir Zelenskiy ikki tomonlama muzokaralardan keyin Ukrainadagi nizoni tinch yo‘l bilan tartibga solish shartini ma’lum qilib, “Rossiya tomonidan jangovar harakatlar zudlik bilan to‘xtatilishi va harbiy xizmatchilar chiqarib ketilishi” kerakligini ta’kidlagandi.

Rossiya tomoni muzokaralar Ukraina tomoni tashabbusi bilan to‘xtatib qo‘yilganini qayd etmoqda. “To‘p to‘liq ular tomonda. Biz muloqotni davom ettirishga tayyormiz. Lekin yana bir marta ta’kidlayman: tinchlik muzokaralarini davom ettirish uchun to‘p Ukraina tomonida. Muzokaralarni muzlatib qo‘yish — batamom Ukrainaning tashabbusi”, — dedi Ukraina bilan muzokaralarda Rossiya delegatsiyasiga rahbarlik qiluvchi Rossiya prezidenti yordamchisi Vladimir Medinskiy.

Uning so‘zlariga ko‘ra, Rossiya hech qachon muzokaralardan, shu jumladan oliy darajadagi muloqotdan bosh tortmagan. Ammo, Medinskiyning aytishicha, ikki prezidentning uchrashishi uchun “jiddiy tayyorgarlik”, xususan “yuqori darajadagi shaylik hujjatlari” zarur, ular esa hozircha mavjud emas.

“Davlat rahbarlari yakuniy kelishuvlarga erishish va hujjatlarni imzolash uchun uchrashishi kerak, suratga tushish uchun emas”, — dedi Rossiya delegatsiyasi rahbari.

Avvalroq Rossiya tashqi ishlar vaziri o‘rinbosari Andrey Rudenko ayni paytda Moskva va Kiyev o‘rtasida tinchlik muzokaralari olib borilmayotganini ma’lum qilgandi. “Ukraina aslida muzokaralar jarayonidan chiqib ketgan”, — dedi u va Kiyev Rossiya tomonidan taqdim etilgan shartnoma loyihasiga o‘z javobini bermaganini qo‘shib qo‘ydi.

Muzokaralarning so‘nggi yuzma-yuz raundi Istanbulda aprel boshida bo‘lib o‘tgandi. Uning yakunlariga ko‘ra ikkala tomon muzokaralar jarayonida muayyan progressga erishilganini ma’lum qilgandi. Ko‘p o‘tmay Moskva Kiyevni tutriqsizlikda va kelishilgan bitimlardan og‘ishga urinishda ayblashni boshladi. Ukraina hukumati, o‘z navbatida, vaqt o‘tishi bilan Rossiya armiyasi jinoyatlari haqidagi ma’lumotlar fonida Ukraina jamiyati RF bilan qandaydir bitimlarga tobora kamroq tayyor bo‘lib borayotganini ayta boshladi.