Vazirlar Mahkamasining “Tashkent Pharma Park innovatsion ilmiy-ishlab chiqarish farmatsevtika klasterida farmatsevtika texnik universiteti faoliyatini tashkil etish to‘g‘risida”gi qarori qabul qilindi, deb xabar beradi Norma.
Prezidentning “Tashkent Pharma Park innovatsion ilmiy-ishlab chiqarish farmatsevtika klasterini tashkil etish to‘g‘risida” 2020-yil 28-yanvardagi qarori bilan Toshkent viloyati Zangiota tumanida Tashkent Pharma Park innovatsion ilmiy-ishlab chiqarish farmatsevtika klasterini tashkil etish nazarda tutilgan.
Klaster o‘z infratuzilmasiga ega bo‘lib, unga ilmiy-tadqiqot markazlari va laboratoriyalar, o‘quv-ilmiy laboratoriyalari va vivariylar, farmakopeya markazi, mehmonxonaga ega simpoziumlar markazi, talabalar, o‘qituvchilar va chet ellik xodimlar uchun turar joy, sport-sog‘lomlashtirish majmuasi, suv havzasi va stadion kiritilgan farmatsevtika texnik universitetini tashkil etishni o‘z ichi oladi.
Quyidagilar universitetning asosiy vazifalari va faoliyat yo‘nalishlari etib belgilangan:
- dori vositalari, tibbiy buyumlar va tibbiy texnika ishlab chiqarish, kosmetologiya, tarmoq va biznesni boshqarish sohalarida xalqaro ta’lim standartlariga muvofiq malakali kadrlar tayyorlash;
- farmatsevtika tarmog‘ida kadrlar tayyorlash tizimini takomillashtirish va modernizatsiya qilishga yo‘naltirilgan innovatsion va samarali ta’lim dasturlari va o‘qitish shakllarini joriy etish;
- ta’lim va fanning uzluksizligi va uzviyligi, shuningdek, ularning jahon ta’limi va ilmiy hamjamiyatga integratsiyalashuvi hisobiga mutaxassislar va ilmiy-pedagogik kadrlarni qayta tayyorlash va ularning malakasini oshirishni amalga oshirish;
- farmatsevtika ta’limi, fan va ishlab chiqarishning yaqin integratsiyasi uchun shart-sharoitlar yaratish va boshqalar.
Universitetda ta’lim jarayoni 2022/2023-o‘quv yilidan boshlanadi hamda bakalavriat ta’lim yo‘nalishlari va magistratura mutaxassisliklariga qabul qilish shartlari, ta’lim olish shakli va ta’lim tili hamkor universitetlar bilan kelishgan holda aniqlanadi.
Hujjat qonun hujjatlari ma’lumotlari milliy bazasida e’lon qilingan va 18-maydan kuchga kirgan.
Avvalroq O‘zbekistonda Dori vositalarining klinik tadqiqotlarini rivojlantirish markazi tashkil etilishi, mamlakatda dorivor o‘simliklarni qayta ishlaydigan korxonalar uskuna, ehtiyot qismlar va xomashyo importida bojxona bojidan ozod qilinishi to‘g‘risida xabar berilgandi.
Izoh (0)