Вазирлар Маҳкамасининг «Tashkent Pharma Park инновацион илмий-ишлаб чиқариш фармацевтика кластерида фармацевтика техник университети фаолиятини ташкил этиш тўғрисида»ги қарори қабул қилинди, деб хабар беради Норма.
Президентнинг «Tashkent Pharma Park инновацион илмий-ишлаб чиқариш фармацевтика кластерини ташкил этиш тўғрисида» 2020 йил 28 январдаги қарори билан Тошкент вилояти Зангиота туманида Tashkent Pharma Park инновацион илмий-ишлаб чиқариш фармацевтика кластерини ташкил этиш назарда тутилган.
Кластер ўз инфратузилмасига эга бўлиб, унга илмий-тадқиқот марказлари ва лабораториялар, ўқув-илмий лабораториялари ва виварийлар, фармакопея маркази, меҳмонхонага эга симпозиумлар маркази, талабалар, ўқитувчилар ва чет эллик ходимлар учун турар жой, спорт-соғломлаштириш мажмуаси, сув ҳавзаси ва стадион киритилган фармацевтика техник университетини ташкил этишни ўз ичи олади.
Қуйидагилар университетнинг асосий вазифалари ва фаолият йўналишлари этиб белгиланган:
- дори воситалари, тиббий буюмлар ва тиббий техника ишлаб чиқариш, косметология, тармоқ ва бизнесни бошқариш соҳаларида халқаро таълим стандартларига мувофиқ малакали кадрлар тайёрлаш;
- фармацевтика тармоғида кадрлар тайёрлаш тизимини такомиллаштириш ва модернизация қилишга йўналтирилган инновацион ва самарали таълим дастурлари ва ўқитиш шаклларини жорий этиш;
- таълим ва фаннинг узлуксизлиги ва узвийлиги, шунингдек, уларнинг жаҳон таълими ва илмий ҳамжамиятга интеграциялашуви ҳисобига мутахассислар ва илмий-педагогик кадрларни қайта тайёрлаш ва уларнинг малакасини оширишни амалга ошириш;
- фармацевтика таълими, фан ва ишлаб чиқаришнинг яқин интеграцияси учун шарт-шароитлар яратиш ва бошқалар.
Университетда таълим жараёни 2022/2023-ўқув йилидан бошланади ҳамда бакалавриат таълим йўналишлари ва магистратура мутахассисликларига қабул қилиш шартлари, таълим олиш шакли ва таълим тили ҳамкор университетлар билан келишган ҳолда аниқланади.
Ҳужжат қонун ҳужжатлари маълумотлари миллий базасида эълон қилинган ва 18 майдан кучга кирган.
Аввалроқ Ўзбекистонда Дори воситаларининг клиник тадқиқотларини ривожлантириш маркази ташкил этилиши, мамлакатда доривор ўсимликларни қайта ишлайдиган корхоналар ускуна, эҳтиёт қисмлар ва хом ашё импортида божхона божидан озод қилиниши тўғрисида хабар берилганди.
Изоҳ (0)