Buxoro shahriga Jahon hunarmandlar shahri maqomi berildi. Bu haqda xalqaro zardo‘zlik va zargarlik, kashtado‘zlik san’ati festivali matbuot anjumanida ma’lum qilindi, deya xabar bermoqda “Daryo” muxbiri.
Prezidentning 2021-yil 29-apreldagi “Xalqaro zardo‘zlik va zargarlik festivalini o‘tkazish to‘g‘risida”gi qaroriga asosan Buxoroda viloyat hokimligi, Madaniyat vazirligi, “Hunarmand” uyushmasi, O‘zbekiston Savdo-sanoat palatasi, “O‘zbekzarsanoat” uyushmasi hamkoriligida 21—25-may kunlari Xalqaro zardo‘zlik va zargarlik, kashtado‘zlik san’ati festivalini o‘tkazish rejalashtirilgan edi.
Mazkur xalqaro festival maqsadi xalq amaliy san’atining zardo‘zlik va zargarlik an’analarini rivojlantirish, ularning noyob namunalarini targ‘ib etish, ushbu yo‘nalishda hunarmandlar o‘rtasida o‘zaro tajriba almashish orqali xalqlar o‘rtasida do‘stlik va hamkorlikni yanada mustahkamlashga, hunarmandchilik an’analari va maktablarini saqlash va qayta tiklashga qaratilgan.
Festival doirasidagi tadbirlar avvalida matbuot anjumani bo‘lib o‘tdi. Matbuot anjumanida Jahon hunarmandchilik Kengashi tomonidan Buxoro shahriga “Hunarmandchilik shahri” maqomi berilgani e’lon qilindi va Buxoro shahriga bu haqdagi sertifikat topshirildi.
“Ma’lumki, Hunarmand uyushmasi 2019-yilning mart oyidan boshlab mazkur tashkilotga a’zo bo‘lgandi. Jahon hunarmandlari shahri unvoni 2014-yilda tashkil etilgan bo‘lib, shu kungacha unga jahonning turli mamlakatlaridagi 30 ta shahar sazovor bo‘lgan. Buxoroi sharif bu bebaho maqomga munosib va u o‘z maqomini dunyo hamjamiyati oldida har doim obro‘ bilan saqlaydi”, — dedi shahar hokimi o‘z so‘zida.
Festival matbuot anjumanida mahalliy ommaviy axborot vositalarining 200 dan ortiq vakillari, AQSH, Rossiya, Angliya, Yangi Zelandiya, Kuvayt, Tojikiston kabi davlatlardan kelgan xorijiy ishtirok etgan.
“Daryo” muxbirining qo‘shimcha qilishicha, matbuot anjumani bo‘layotgan paytda Buxoroda chang bo‘roni kuzatildi. Festival mas’ullari har qanday tabiiy holatga qaramay, festival tadbirlari davom etishini bildirgan.
Izoh (0)