АҚШ Давлат котиби Энтони Блинкеннинг айтишича, 1990 йилларда Россия НАТОга кириш таклифини рад этган. Бу ҳақда у телебошловчи Стивен Колберга берган интервьюсида айтди, уларнинг суҳбати стенограммаси АҚШ Давлат департаменти сайтида чоп этилди.
Суҳбат чоғида Колбер Рим папаси Францискнинг сўзларини эслатди. Папа НАТОнинг Россия чегараларигача кенгайиши Украинада уруш бошланишига ҳисса қўшганини айтганди. Блинкен бунга жавобан НАТОнинг Россияга нисбатан агрессив нияти йўқлигини айтди:
НАТО мудофаа иттифоқидир, давлатлар бирлашади, агар улардан бирига ҳужум қилинса, қолган ҳамма келиб уни ҳимоя қилади. Альянснинг моҳияти шундан иборат. Унинг Россияга қарши агрессив нияти йўқ. У ҳеч қачон Россияга ҳужум қилмаган, ҳужум қилмайди ҳам. НАТО Россияга ҳужум қилмоқчи эмас.Бунга жавобан журналист ҳазиллашиб, Россияни НАТОга қабул қилишни таклиф қилди. Блинкен эса шундай жавоб берди: «Биласизми, 1990 йилларда ҳақиқатан ҳам бу ҳақда гап бўлган. Россияликларнинг ўзи бундан бош тортган», — деди Давлат департаментининг раҳбари.
Россия президенти Владимир Путин 1990—2000 йилларда Россиянинг НАТОга кириши масаласи кўтарилганини бир неча бор таъкидлаган. 2017 йилда Путин АҚШнинг 42-президенти Билл Клинтон унга бу ҳақда ўйлаб кўришни таклиф қилганини айтган. Путиннинг таъкидлашича, у «қарши эмасман» деб жавоб берган, «бундан эса бутун АҚШ делегацияси асабийлашган.»
2022 йил февраль ойида Путин Клинтоннинг таклифга жавоби «жуда вазмин бўлганини» маълум қилди. Ўз навбатида, Билл Клинтон у Борис Ельцинга ҳам, Владимир Путинга ҳам Россияни НАТОга қўшишни таклиф қилганини айтди.
Изоҳ (0)