AQSH hukumati Ukrainaga Rossiyaning Qora dengizdagi blokadasini yengib o‘tishga yordam beruvchi zamonaviy kemaga qarshi raketalarni topshirishni rejalashtirmoqda. Bu haqda Reuters AQSH ma’muriyati va Kongressdagi manbalarga tayanib xabar berdi.
Qurol-yarog‘lar Kiyevga to‘g‘ridan to‘g‘ri yoki ushbu turdagi qurollar zaxirasiga ega bo‘lgan Yevropa davlati orqali yuborilishi kutilmoqda. Manbalarning aytishicha, bir qancha davlatlar Ukrainaga Harpoon raketalarini yuborishga tayyor, ammo ular Rossiya kemasi raketa bilan cho‘ktirilgan taqdirda, uning qasos olishidan qo‘rqib, hech biri qurollarni birinchi yetkazib berishni yoki yagona ta’minotchi bo‘lishni istamayapti.
Buyuk Britaniya Mudofaa vazirligi ma’lumotlariga ko‘ra, Qora dengizdagi operatsion zonada Rossiya harbiy-dengiz kuchlarining 20 ga yaqin kemasi, jumladan, suvosti kemalari bor. Harbiy ekspert Brayan Klarkning agentlikka aytishicha, Rossiya kemalariga tahdid qilish va Moskvani blokadani olib tashlashga majburlash uchun 12 tadan 24 tagacha Harpoon tipidagi raketalar yetarli bo‘ladi.
Avvalroq Politico nashri AQSH Kiyevning so‘roviga qaramay, Ukrainani uzoq masofaga baravar o‘t ochuvchi reaktiv tizimlar bilan ta’minlamayotgani haqida xabar bergandi. Manbalarning so‘zlariga ko‘ra, Oq uy bunday qurollar Rossiya hududiga zarba berish uchun qo‘llanilishidan, bu esa mojaroni faqat kengaytirishi va cho‘zishidan xavotirda. Ukraina rasmiylari ushbu turdagi qurollarni bir necha oydan beri so‘rab keladi.
Shu bilan birga 19-may kuni AQSH senati Ukrainaga 40 milliard dollar miqdorida qo‘shimcha yordam ajratish haqidagi qonun loyihasini bir ovozdan ma’qulladi. Senatorlar qonunni o‘tgan haftadayoq tezkor tartibda qabul qilmoqchi edi, ammo respublikachi Rend Pol mazkur hujjatga bir qator o‘zgartirishlar kiritish yuzasidan taklif berib, ushbu jarayonni muayyan vaqtga bloklagan. Endi qonun kuchga kirishi uchun uni AQSH prezidenti Jo Bayden imzolashi qoldi.
Izoh (0)