Jami global qarz 2022-yilning birinchi choragida yana 3,3 trln dollarga oshib, yangi rekord darajaga yetdi. Umumiy qarz 305 trln dollarni yoki jahon yalpi ichki mahsulotining 348 foizini tashkil etdi. Bu haqda “Kommersant” xabar bermoqda.
Yalpi ichki mahsulotga nisbatan qarz hozirda 2021-yilning birinchi choragidagi eng yuqori cho‘qqisiga nisbatan 15 foizga kam. Moliyaviy sektorsiz umumiy qarz 236 trln dollarni tashkil etadi, bu pandemiya boshidagidan 40 trln dollarga ko‘pdir.
Qarzning katta qismi hamon iqtisodiyoti rivojlangan mamlakatlarga to‘g‘ri keladi – 206,7 trln dollar (bir yil avval – 204,4 trillion dollar). Rivojlanayotgan mamlakatlarda esa bu ko‘rsatkich 98,6 trln dollarga yetdi.
Birinchi chorakda ko‘rsatkichning o‘sishi ikki davlat – Xitoy (qo‘shimcha 2,5 trln dollar) va AQSH (1,8 trln dollar) tomonidan ta’minlandi. Yevropa hududida, aksincha, uchinchi chorak ketma-ket qarz yukining kamayishi kuzatilmoqda.
Rossiya uchun raqamlar faqat YIMga nisbatan berilgan: uy xo‘jaliklarining yuki yil davomida 22,3 foizdan 21,5 foizgacha, korxonalar — 85,3 foizdan 74,6 foizgacha, moliya sektori — 11,1 foizdan 10,7 foizgacha pasaydi.
O‘zbekistonda vaziyat qanday?
O‘zbekistonning yalpi tashqi qarzi 2021-yilda birinchi marta 40 mlrd dollardan oshib, 41,6 mlrd dollarni tashkil qildi.
O‘tgan yilga nisbatan qarz 12,7 foizga oshdi. YIMga nisbatan yalpi tashqi qarz 0,6 foizga kamayib, 60,1 foizni tashkil qildi.
Moliya vazirligining ma’lum qilishicha, joriy yilda davlatning jami qarzi 26,3 milliard dollarni tashkil etadi. Shundan 2,7 milliard dollari ichki qarz, 23,6 milliard dollari tashqi qarz hisoblanadi.
Tashqi qarzning asosiy qismi — 5,9 milliard dollar davlat budjetini qo‘llab-quvvatlashga sarflansa, keyingi o‘rinlarda elektr-energiya tarmog‘i va energetika tizimi joylashgan.
Izoh (0)