Latviya tashqi ishlar vaziri Edgars Rinkevichs Financial Times gazetasiga bergan intervyusida Boltiq dengizi NATO hududiga aylanib borayotganini, bu esa dengizdagi xavfsizlikni kuchaytirishini aytdi. “Boltiq dengizi NATO dengiziga aylanmoqda”, — dedi u.
Foto: Reuters
Xuddi shu fikrni Litva tashqi ishlar vaziri Gabriyelus Landsbergis ham ta’kidlab, ikki yangi davlat – Shvetsiya va Finlyandiyaning NATOga qo‘shilishi siyosiy nuqtai nazardan “ishonchlilik” berishi hamda Shimoliy Yevropa va Boltiqbo‘yida xavfsizlikni mustahkamlashini aytdi. Uning qo‘shimcha qilishicha, alyans “NATO hududining har bir dyuymini himoya qilish” uchun konsensusga erishishi kerak.
Xuddi shunday pozitsiyani Estoniya tashqi ishlar vaziri Eva-Mariya Liymets ham bildirgan.
Finlyandiya prezidenti Sauli Niinistyo va bosh vazir Sanna Marin 12-may kuni ertalab qo‘shma bayonot e’lon qilib, mamlakat NATOga a’zo bo‘lish uchun “zudlik bilan” ariza berishi kerakligi haqida aytgandi. Ularning fikricha, bu qadam Finlyandiya va butun ittifoq xavfsizligini mustahkamlashi kerak.
Neytral maqomga ega Shvetsiya va Finlyandiyaning NATOga kirishi Rossiyaning Ukrainaga bostirib kirishidan keyin faol muhokama qilina boshladi. Finlyandiyaning Helsingin Sanomat gazetasi mamlakat hukumati 15-may kuni NATOga a’zo bo‘lish uchun ariza berishni rejalashtirayotgani haqida xabar bergandi. Shu bilan birga, nashrning yozishicha, Shvetsiya ham xuddi shu kuni ariza topshiradi.
Rossiya Tashqi ishlar vazirligi Finlyandiya bosh vaziri va prezidentining nutqidan so‘ng, Moskva Finlyandiyaning NATOga kirishiga javob qaytarishini, jumladan, harbiy-texnik xarakterdagi choralar ko‘rishini ma’lum qildi. Vazirlik mamlakat xavfsizligiga tahdidlarni “to‘xtatish”ga va’da berdi.
O‘z navbatida, Rossiyaning BMTdagi doimiy vakili birinchi o‘rinbosari Dmitriy Polyanskiy Britaniya nashriga bergan intervyusida, agar NATO o‘z hududlarida o‘z qo‘shinlarini joylashtirishga qaror qilsa, Shvetsiya va Finlyandiya Moskva nishoniga aylanishi mumkinligini aytdi.
