Kanada hukumati mamlakatda Huawei mahsulotlaridan foydalanishni taqiqladi
Kanada Xitoyning Huawei va ZTE telekommunikatsiya kompaniyalarining mahsulot va xizmatlarini mamlakatda taqiqlamoqda, dedi Innovatsiyalar, fan va sanoat vaziri Fransua-Filipp Shampan.
Avval Ottava Huawei kompaniyasiga milliy 5G aloqa tarmog‘ini yaratishda ishtirok etishni taqiqlashi haqida xabar berilgan.
“Kanada hukumati telekommunikatsiya infratuzilmamizning uzoq muddatli xavfsizligini ta’minlamoqda. Ushbu reja doirasida hukumat Huawei hamda ZTE mahsulot va xizmatlarini mamlakat telekommunikatsiya tizimlariga kiritishni taqiqlaydi”, — deyiladi xabarda.
Shampanning aytishicha, hukumatning taqiq to‘g‘risidagi qarori mustaqil xavfsizlik agentliklari tomonidan sinchkovlik bilan tekshiruv va Kanadaning eng yaqin ittifoqchilari bilan maslahatlashuvlardan so‘ng qabul qilingan.
Bayonotga ko‘ra, Kanadadagi Huawei va ZTE uskunalaridan foydalanayotgan kompaniyalar ulardan voz kechishi shart bo‘ladi.
Kanada josuslik xavfi tufayli Huawei kompaniyasining milliy 5G tarmoqlariga kirishini taqiqlash yoki cheklash bo‘yicha Five eyes razvedka alyansidagi (AQSH, Buyuk Britaniya, Kanada, Avstraliya, Yangi Zelandiya razvedka xizmatlarini birlashtirgan) beshinchi va so‘nggi davlatga aylandi.
