Kanada va Avstraliyada ilk bor maymunchechak bilan kasallanish holatlari aniqlandi
Kanadada ikki kishida maymunchechak bilan kasallanish holati tasdiqlandi, Avstraliyada esa bir kishi ushbu infeksiyaga chalinganlikda gumon qilinmoqda. Bu haqda ikki davlat sog‘liqni saqlash vazirliklarining saytlariga tayanib “RBK” xabar berdi.
“Kvebek provinsiyasiga Milliy mikrobiologik laboratoriya tomonidan olingan ikkita namunada maymunchechak kasalligi aniqlangani haqida xabar berildi. Bu Kanadada tasdiqlangan dastlabki ikkita holat”, — deyiladi Kanada sog‘liqni saqlash vazirligi bayonotida.
Kvebek — mamlakatning sharqiy provinsiyalaridan biri, janubda u AQSH bilan chegaradosh. Vazirlikning ta’kidlashicha, chechak bilan kasallangani taxmin qilinayotgan amerikalik yaqinda provinsiyadagi shaharlaridan biri — Monrealga tashrif buyurgan.
Ma’lumot uchun, maymunchechak birinchi marta 1958-yilda aniqlangan noyob yuqumli kasallikdir. U bilan kasallanish asosan, Afrikada kuzatilgan: odatda ushbu kasallikni 16 yoshgacha bo‘lgan o‘smirlar yuqtirgan. Tadqiqotlar shuni ko‘rsatdiki, maymunchechak ko‘proq chechakka o‘xshaydi. Kasallikning o‘lim darajasi taxminan 10 foizni tashkil qiladi, ehtimoliy asoratlar orasida ensefalit, meningoensefalit, pnevmoniya, sepsis mavjud. Tabiiy chechakka qarshi emlash maymunlar orasida keng tarqalgan ushbu virusga qisman immunitetni ta’minlaydi.
“40 yoshlardagi erkak Sidneyga qaytganidan bir necha kun o‘tgach unda yengil simptomli kasallik paydo bo‘ldi. Keyinchalik u shifokoriga klinik jihatdan maymunchechakka o‘xshash alomatlar haqida xabar berdi”, — deyiladi Avstraliya sog‘liqni saqlash vazirligi xabarida. Shoshilinch tekshiruv natijalariga ko‘ra, erkak chechakning ushbu turi bilan kasallangan, ammo ikkinchi tasdiqlovchi tadqiqot o‘tkazilmoqda, bemor izolyatsiyaga olingan.
Sal avval maymunchechak AQSH va Yevropada qayd etilgan. Xususan, 7-may kuni Buyuk Britaniyada bir kishida — Nigeriyadan qaytgan odamda kasallik aniqlandi. 18-may kuni esa Qo‘shma Shtatlarda Kanadada bo‘lib qaytgan bemorda infeksiya qayd etildi.
Mavzuga doir:
