Жами глобал қарз 2022 йилнинг биринчи чорагида яна 3,3 трлн долларга ошиб, янги рекорд даражага етди. Умумий қарз 305 трлн долларни ёки жаҳон ялпи ички маҳсулотининг 348 фоизини ташкил этди. Бу ҳақда «Коммерсантъ» хабар бермоқда.
Ялпи ички маҳсулотга нисбатан қарз ҳозирда 2021 йилнинг биринчи чорагидаги энг юқори чўққисига нисбатан 15 фоизга кам. Молиявий секторсиз умумий қарз 236 трлн долларни ташкил этади, бу пандемия бошидагидан 40 трлн долларга кўпдир.
Қарзнинг катта қисми ҳамон иқтисодиёти ривожланган мамлакатларга тўғри келади – 206,7 трлн доллар (бир йил аввал – 204,4 триллион доллар). Ривожланаётган мамлакатларда эса бу кўрсаткич 98,6 трлн долларга етди.
Биринчи чоракда кўрсаткичнинг ўсиши икки давлат – Хитой (қўшимча 2,5 трлн доллар) ва АҚШ (1,8 трлн доллар) томонидан таъминланди. Европа ҳудудида, аксинча, учинчи чорак кетма-кет қарз юкининг камайиши кузатилмоқда.
Россия учун рақамлар фақат ЯИМга нисбатан берилган: уй хўжаликларининг юки йил давомида 22,3 фоиздан 21,5 фоизгача, корхоналар — 85,3 фоиздан 74,6 фоизгача, молия сектори — 11,1 фоиздан 10,7 фоизгача пасайди.
Ўзбекистонда вазият қандай?
Ўзбекистоннинг ялпи ташқи қарзи 2021 йилда биринчи марта 40 млрд доллардан ошиб, 41,6 млрд долларни ташкил қилди.
Ўтган йилга нисбатан қарз 12,7 фоизга ошди. ЯИМга нисбатан ялпи ташқи қарз 0,6 фоизга камайиб, 60,1 фоизни ташкил қилди.
Молия вазирлигининг маълум қилишича, жорий йилда давлатнинг жами қарзи 26,3 миллиард долларни ташкил этади. Шундан 2,7 миллиард доллари ички қарз, 23,6 миллиард доллари ташқи қарз ҳисобланади.
Ташқи қарзнинг асосий қисми — 5,9 миллиард доллар давлат бюджетини қўллаб-қувватлашга сарфланса, кейинги ўринларда электр-энергия тармоғи ва энергетика тизими жойлашган.
Изоҳ (0)