“Mahalla” telekanali tomonidan efirga uzatilgan ko‘rsatuv davomida advokat fohishaxonalar foyda keltirayotganini aytgani aks etgan videolavha ijtimoiy tarmoqlarda tarqalib, muhokamalarga sabab bo‘ldi.
“Fohishaxonalar bormi bizda? Nima uchun yopmaymiz? Bizda bularni yopish imkoni bor, bitta tadbir e’lon qilinib, hammasini yopib yuborishimiz mumkin. Uni yopmaymiz, chunki bizga foyda keltiradi. U yerdan qaysidir jinoyatchini aniqlaymiz, fohishaxonalar orqali narkotik moddalar tarqatiladi”, — degan advokat ko‘rsatuvdan olingan parchada.
Ma’lum bo‘lishicha, ushbu lavha 18-may kuni “Mahalla” telekanali orqali efirga uzatilgan “Minbar” ko‘rsatuvidan olingan. Advokat Amrullo Ahmedovning o‘zi Facebook’dagi sahifasi orqali ushbu video yuzasidan izoh berdi.
Uning so‘zlariga ko‘ra, keng tarqalgan kontekst video ommaning e’tiborini tortish va unga nisbatan yomon fikr uyg‘otish uchun tarqatilgan bo‘lib, unda aslida boshqa maqsadga aytilgan fikrlar tashlab yuborilgan.
“Shaxsan menga bu holatdan kim yoki qaysi tashkilot manfaatdor bo‘lishi ma’lum emas. Lekin fohishalar yordamida narkobiznesni targ‘ib qilish, yoshlarimizni jinoyat sodir etish yo‘liga yetaklash noto‘g‘ri usul ekanligini va bundan voz kechish zarurligini ta’kidlamoqchi bo‘lib aytgan fikrlarim shunchaki qirqib tashlangan. Ushbu nutqimda biz deb gapirganimning boisi ham ushbu illatga barchamiz mas’ul ekanligimizni bildiradi.
Shaxsan men, qaysidir tizimni tanqid qilish bilan emas, balki fohishalar orqali narkobiznes va boshqa jinoyatlarni targ‘ib etish holatlariga chek qo‘yishimiz va shu orqali eski uslubdan voz kechish zarurligini ta’kidlagandim”, — degan u va o‘sha kungi nutqining to‘liq videosini taqdim etgan.
Izoh (0)