O‘zbekiston hududlarida 2022-yilda sement-beton qoplamali ichki yo‘llarni qurish parametrlari tasdiqlandi

Prezident qarori bilan Qoraqalpog‘iston Respublikasi, viloyatlar va Toshkent shahrida 2022 yilda sement-beton qoplamali ichki yo‘llarni qurish parametrlari tasdiqlandi. Bu haqda Telegram’dagi “Nigoh” kanali xabar qildi.

Hujjatga ko‘ra, 2022-yilda sement yoki beton ishlab chiqaruvchilarni jalb qilgan holda sement-beton qoplamali ichki yo‘llarni qurish va ta’mirlash ishlari klaster usulida amalga oshiriladi. 2022-yilda klaster usulida sement-beton qoplamali ichki yo‘llarni qurish ishlari bo‘yicha:

• manzilli ro‘yxatlar Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan sektorlar rahbarlarining joylarda jamoatchilik fikri va talabini inobatga olgan holda bildirgan takliflari asosida shakllantiriladi hamda Qoraqalpog‘iston Respublikasi Juqorg‘i Kengesi, xalq deputatlari viloyatlar va Toshkent shahar Kengashlari tomonidan tasdiqlanadi;
• loyiha tashkilotlarini jalb etish, mas’ul tashkilotlar bilan texnik shartlarni kelishish, loyiha-smeta hujjatlarini ishlab chiqish va ularni davlat ekspertizasidan o‘tkazishni tashkil etish ishlari buyurtmachi tashkilotlar tomonidan amalga oshiriladi;
• klaster usulida sement-beton qoplamali ichki yo‘llarni qurish ishlarini amalga oshiruvchi bosh pudratchi tashkilot Qoraqalpog‘iston Respublikasi Juqorg‘i Kengesi, xalq deputatlari viloyatlar va Toshkent shahar Kengashlari tomonidan eng yaxshi takliflarni tanlab olish orqali aniqlanadi;
• qurilish ishlari yakunlanib, obyektlar foydalanishga qabul qilingandan so‘ng shahar va tuman obodonlashtirish boshqarmalari tasarrufiga beriladi hamda ushbu ichki yo‘llarni bosh pudratchi tomonidan o‘z mablag‘lari hisobidan 5 yil davomida kafolatli soz holatda saqlash va ekspluatatsiya qilish ishlarini amalga oshirish bo‘yicha bosh pudratchi bilan shartnoma tuziladi.