Korrupsiyaga qarshi kurashish agentligi 2022-yil 1-choragi yakunlariga ko‘ra, mahalliy budjet daromadlar rejasining rejadan orttirib bajarilgan qismi va mazkur mablag‘lar yo‘naltirilgan maqsadlar to‘g‘risidagi ma’lumotlarning ochiqlanish holatini o‘rgandi. Bu haqda agentlik matbuot xizmati xabar berdi.
O‘rganishlar natijasida Jizzax, Surxondaryo, Sirdaryo, Farg‘ona va Toshkent viloyati hokimliklarining rasmiy veb-saytlarida ushbu ma’lumotlar o‘z vaqtida e’lon qilib borilayotgani, Qoraqalpog‘iston Respublikasi Vazirlar Kengashi, Qashqadaryo, Navoiy, Samarqand, Namangan, Xorazm viloyati hokimliklari tomonidan esa qisman ochiqlangani aniqlangan.
Andijon viloyat hokimligi rasmiy veb-saytida bunday ma’lumotlar so‘nggi bor 2021-yil 1-choragi holatiga joylashtirilgan, Toshkent shahar hokimligi tomonidan umuman ochiqlanmagan.
“Davlat organlari va tashkilotlarining faoliyati ochiqligini ta’minlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida”gi prezident farmoni talablari to‘liq ijro etilishi ta’minlangan Toshkent viloyati hokimligida 2022-yil boshida shakllangan erkin qoldiq mablag‘lari hamda shu yilning 1-choragi davomida mahalliy budjet daromadlar rejasining oshirib bajarilgan qismi hisobidan ajratilgan mablag‘lar jami 231,3 milliard so‘mni tashkil etgan. Ular viloyat hokimining farmoyishiga asosan quyidagicha taqsimlangan:
- hududning ijtimoiy-iqtisodiy rivojlantirish dasturlari uchun 82,3 milliard so‘m;
- markazlashgan jamg‘armalarga 31,9 milliard so‘m;
- “Fuqarolar tashabbusi” (openbudget) 27,3 milliard so‘m;
- obod qishloq va obod mahalla dasturi doirasida 16,9 milliard so‘m;
- budjet tashkilotlarining moddiy bazasini mustahkamlash va xo‘jalik xarajatlari uchun 16 milliard so‘m;
- obodonlashtirish xarajatlariga 9,3 milliard so‘m;
- madaniy-sport tadbirlar, festivallar, umumxalq va milliy bayramlari uchun 5,4 milliard so‘m;
- boshqa xarajatlar uchun 11,8 milliard so‘m.
- hududlarni ijtimoiy-iqtisodiy rivojlantirish dasturlari va ijtimoiy soha muassasalarini qurish, ta’mirlash va jihozlash ishlari uchun 11,5 milliard so‘m;
- harbiy ma’muriy sektorga yuklatilgan vazifalar ijrosini ta’minlash uchun 8,5 milliard so‘m;
- “Fuqarolar tashabbusi” jamg‘armasiga 5,7 milliard so‘m;
- “Yoshlar daftari” jamg‘armasiga 2,8 milliard so‘m;
- umumxalq bayramlari, sport va madaniy tadbirlar o‘tkazish bilan bog‘liq xarajatlar uchun 2,4 milliard so‘m;
- “Ayollar daftari” jamg‘armasiga 1,9 milliard so‘m;
- “Saxovat va ko‘mak” jamg‘armasiga 1,9 milliard so‘m;
- “Obod qishloq” va “Obod mahalla” dasturlari uchun 1 milliard so‘m.
Agentlik tomonidan monitoring natijasida aniqlangan xato va kamchiliklarni bartaraf etish hamda kelgusida ochiqlikka oid qonunchilik hujjatlarida belgilangan talablarga qat’iy rioya etilishini nazoratga olish bo‘yicha 8 ta mahalliy hokimlikka ogohlantirish yuborilgan.
Bundan tashqari, Prezidenti Administratsiyasi va Vazirlar Mahkamasiga aniqlangan holatlar yuzasidan tegishli ma’lumot kiritilgan.
Eslatib o‘tamiz, fevral o‘rtalarida O‘zbekistonda vazirlik, qo‘mita va viloyat hokimliklarining ochiqlik indeksi bo‘yicha reytingi e’lon qilingandi. Mahalliy davlat hokimiyati organlari orasida Samarqand viloyati birinchi (83,83 ball) o‘rinni olgan. Ikkinchi bo‘lib Namangan viloyati (79,32 ball), uchinchi o‘rinda Xorazm viloyati (72,38 ball) qayd etilgan.
Izoh (0)