Toshkentda akademik, tarix fanlari doktori, “O‘zbekiston madaniy merosi jahon to‘plamlarida” loyihasining ilmiy rahbari Edvard Rtveladze tavalludining 80 yilligiga bag‘ishlangan xotira kechasi bo‘lib o‘tdi. Bu haqda “Daryo” muxbiri xabar bermoqda.
Tadbir O‘zbekiston madaniy merosini asrash, o‘rganish va targ‘ib qilish bo‘yicha Butunjahon jamiyati, Fanlar akademiyasi, Turizm va madaniy meros vazirligi tomonidan tashkil etildi.
Edvard Rtveladze Markaziy Osiyo mintaqasi tarixi va madaniyati qatlamlari, Buyuk Ipak yo‘lining eski va yangi yo‘llarini tadqiq etgan. O‘zbekistonda va xorijda chop etilgan 800 dan ortiq ilmiy maqolalarga mualliflik qilgan.
Olim Markaziy Osiyo va Shimoliy Kavkazda 100 dan ortiq arxeologik ekspeditsiyalarda qatnashgandi. 1990-yillar oxirida Toxariston arxeologik ekspeditsiyasini tuzib, qadimiy Kampirtepa manzilgohida tadqiqotlarni qayta tiklagan, bu yerda Markaziy Osiyo arxeologik amaliyotida birinchi marta aholi punktining to‘liq ochilishi amalga oshirilgan, uning joylashuvi va Kushonlar davriga oid shahar tuzilmasi aniqlangandi.
Edvard Rtveladzening oxirgi eng mashhur arxeologik kashfiyotlardan biri miloddan avvalgi IV oxirida asos solingan Oks Aleksandriyasi bo‘ldi. Qadimiy shahar milodiy I asr boshlarigacha hozirgi Surxondaryo hududida joylashgandi.
Umrining so‘nggi yillarida Rtveladze “O‘zbekiston madaniy merosi jahon to‘plamlarida” loyihasining ilmiy rahbari vazifasini bajardi. Uning rahbarligida “O‘zbekiston madaniy merosi jahon to‘plamlarida” turkumiga oid 50 ta kitob-albom nashr etildi. Olim 2022-yil fevral oyida 80 yoshida vafot etdi.
Kechada O‘zbekiston madaniy merosini asrash, o‘rganish va targ‘ib qilish bo‘yicha butunjahon jamiyati raisi Firdavs Abduxoliqov “Edvard Rtveladze xotirasi” nomli kitobning dastlabki pilot nashrini taqdim etdi. Kitob olimning hamkasblari, do‘stlari, oila a’zolari va yaqinlari tomonidan yozilgan 50 dan ortiq maqolani o‘z ichiga olgan.
Tadbirda Oliy Majlis Senati raisining birinchi o‘rinbosari Sodiq Safoyev, “O‘zbekiston madaniy merosi jahon to‘plamlarida” loyihasi tahririyat kengashi raisi, akademik Akmal Saidov, O‘zbekiston Respublikasi Bosh vazirining o‘rinbosari Aziz Abduhakimov, Gruziyaning O‘zbekistondagi Favqulodda va muxtor elchisi Zurab Abdushelishvili ishtirok etdi va so‘zga chiqdi.
Izoh (0)