“Arsenal”ning mag‘lubiyatidan keyin “Chelsi” YChL yo‘llanmasiga ega bo‘ldi, “Tottenhem” esa 4-o‘ringa chiqib oldi

“Arsenal” Angliya Premyer Ligasining 37-turida “Nyukasl”ga 0:2 hisobida imkoniyatni boy berdi.

“Kanonirlar”ning mag‘lubiyati “Chelsi”ga Chempionlar Ligasi yo‘llanmasini qo‘lga kiritishiga yordam berdi. “Arsenal” 37 turdan so‘ng 66 ochko jamg‘ardi, “aristokratlar” esa 36 o‘yindan so‘ng 70 ochko to‘plagan.

Shu tariqa Tomas Tuxel shogirdlari 3-o‘rinda mustahkam joylashdi va YChL yo‘llanmasini qo‘lga kiritdi.

Mikel Arteta shogirdlari esa Chempionlar Ligasi yo‘llanmasidan quruq qolishi mumkin.

Londonning “Tottenhem” jamoasi 68 ochko bilan 4-pog‘onani band etib turibdi. “Shporlar” so‘nggi turda “Norvich” bilan bahs olib boradi. “Arsenal” esa “Everton”ga qarshi o‘ynaydi. Agar Antonio Konte jamoasi so‘nggi turda durang natija qayd etsa, “Arsenal” esa g‘alaba qozonsa, unda to‘plar nisbatiga e’tibor qaratiladi: “Tottenhem”da hozir to‘plar nisbati +24 (64:40), “kanonirlar”da esa +9 (56:47). 4-o‘rinni egallash uchun “Arsenal” 16 ta to‘p farqi bilan g‘alaba qozonishi zarur bo‘ladi.

“Everton” mag‘lub etilsa va “Tottenhem” “Norvich”ga imkoniyatni boy bersa, “Arsenal” 4-o‘ringa chiqib oladi.

“Norvich” APLda jon saqlab qolish imkoniyatini yo‘qotib bo‘ldi, “Everton” esa keyingi mavsum yuqori divionda ishtirok etish masalasini to‘la hal qilgani yo‘q. Shuning uchun Frenk Lempard shogirdlari ushbu o‘yinga jiddiy tayyorgarlik ko‘rishi aniq.