Futbol – yildan-yilga o‘zgarayotgan, takomillashib borayotgan, millionlar emas, balki milliardlar o‘yiniga aylanayotgan sport turi. Internet nashrlar rivojlanib, yangiliklar turli tarmoqlarda uzatilishidan avval barcha sohalarga qatori futbolga oid yangiliklar ham insonlarga televideniye, radio va gazeta-jurnallar orqali yetkazib berilgan.
Xo‘sh, 11 yil avval o‘zbek futbol gazetalari nimalar haqida yozgan, mulohazalar qilgan, kimlar bilan intervyular uyushtirgan? Bularning barchasi “O‘zbek futboli gazetalari tarixi” ruknida e’lon qilib boriladi.
O‘z davrining eng suyukli nashri bo‘lgan “Interfutbol” gazetasining 2011-yil 17-may sanasida chiqqan sonida Usmon Toshevning “Nasaf” menejeri bo‘lgani haqida xabar berilgan. Ta’kidlanishicha, Toshev ushbu lavozimda “Bunyodkor”ga o‘tib ketgan Bahrom Davletovning o‘rnini egallagan. Xabarda, shuningdek, Usmon Toshevning 2008-yili ham “Nasaf”da ishlagani aytilgan.
Ma’lumot uchun, 2021-yilning oktabr oyida Usmon Toshev O‘FA terma jamoalar bo‘limi boshlig‘i etib tayinlangan edi va hozirda shu lavozimda ishlab kelmoqda.
O‘zbekiston chempionati taqvimidagi o‘zgarishlar o‘sha vaqtlarda ham tez-tez bo‘lib turgan. Terma jamoaning o‘rtoqlik uchrashuvlarida “Paxtakor” hamda “Bunyodkor” futbolchilari ishtirok etishi sabab O‘zbekiston chempionatining 10-turidan o‘rin olgan ushbu ikki jamoa o‘rtasidagi bahs 29-mayga qoldirilgan.
Shuningdek, “Bunyodkor”ning OCHL 1/8 final o‘yini safarda “Sepahon”ga qarshi o‘tishi munosabati bilan jamoaning 9-turdan o‘rin olgan “Olmaliq”qa qarshi o‘yini bir kun oldinga surilib, 19-mayga belgilangan.
“Qizlarga xorijlik murabbiy kerak” sarlavhasi ostidagi xabarda gap O‘zbekiston 20 yoshgacha bo‘lgan qizlaridan tuzilgan terma jamoaga xorijiy mamlakatdan murabbiy olib kelish bo‘yicha muzokaralar olib borilayotgani aytilgan. Ushbu masala yuzasidan sobiq O‘FF prezidenti Mirabror Usmonov topshiriq bergan.
Ushbu xabarda yana bir e’tiborga loyiq holat bor: O‘FFga FIFA vakillarining kelishi kutilayotgani va unda yollar o‘rtasida U-20 Jahon chempionatini O‘zbekistonda o‘tkazish masalasi muhokama qilinishi aytilgan. O‘shanda FIFA O‘zbekistonga mundial mezbonligini bergan, biroq keyinchalik tashkilotning o‘zi O‘zbekistonni bu huquqdan mahrum qilgandi.
Aynan 2011-yili Rossiyaning “Anji” safiga borib qo‘shilgan Odil Ahmedov rus nashrlaridan biriga bergan intervyusida braziliyalik Rivaldo va Roberto Karlos haqida shunday degan: “Rivaldo katta iqtidor sohibi. Uning hujumni yakunlash paytidagi harakatlari, aqlli va aniq to‘p uzatishlari va boshqa bir qancha jihatlarini ko‘rib-kuzatib, o‘zimga ancha foydali tomonlarni o‘zlashtirdim. U va boshqa mashhur futbolchilar o‘zbek futboliga katta naf berdi. Roberto ham hozir Rossiya ligasiga foyda keltirmoqda. Uning yonida to‘p surish juda oson. Tajribasi ulkan, hamma narsani biladi. Masalan, qanday o‘ynash, kimga va qachon to‘p uzatish, turli vaziyatlarda samarali harakat qilish...”.
Jahon futbolida ham yangiliklar bisyor. Masalan, “Real Madrid” futbolchilari o‘rin olgan avtobus toshbo‘ron qilingan. Oqibatda avtobusning bita oynasi chilparchin bo‘lgan.
Xabarda ta’kidlanishicha, ushbu holat 2010/2011-yilgi mavsumning o‘zida uchinchi marta sodir bo‘lgan. Ulardan biri “El-Klasiko” arafasida “Barselona” muxlislari tomonidan sodir etilgan.
FIFAda esa saylov yaqin. O‘sha paytlarda tashkilot prezidenti bo‘lgan Zepp Blatterning ma’lum qilishicha, agar u FIFA prezidentligi uchun saylovlarda mag‘lub bo‘lsa, tashkilot o‘z faoliyatini to‘xtatishi ham mumkin.
Xabardagi yana bir e’tiborga molik jihat – Angliya futbol assotsiatsiyasining Blatterni ham, OFK prezidenti Muhammad bin Hammamga ham saylovlarda ovoz bermasligi.
“Futbol-Ekpress” gazetasida esa Okeaniya Futbol Konfederatsiyasi saylovda Blatterni qo‘llab-quvvatlashga qaror qilgani aytilgan xabar e’lon qilingan.
Gazetada, shuningdek, “Buxoro” jamoasi bosh murabbiyi Gennadiy Gennadyevich bilan suhbat chiqqan. “Bugungi kunda Yevropaning aksariyat klublari 4-3-3 sxemasiga o‘tmoqda. Bizning jamoalarda shunday vazifalarni amalga oshirish uchun ijrochilarning saviyasi yetarli darajadami?”, deb berilgan savolga murabbiy O‘zbekiston milliy terma jamoasi hujumkor futbolga e’tibor qaratayotganini ta’kidlagan.
“Akramov zo‘rmi yoki Abramov?” sarlavhali maqolada O‘zbekiston terma jamoasini 1994-yilda Osiyo o‘yinlari g‘olibi qilgan Rustam Akramov hamda 2011-yilga Osiyo Kubogida terma jamoani yarim finalga olib chiqqan Vadim Abramov solishtirilgan.
Maqoladagi e’tiborga molik iqtibos, jumladan, shunday: “Hozir Vadim Abramov terma jamoamiz tarixida eng omadli murabbiylardan biri sifatida tilga olinmoqda. Chindan ham u ilgari misli ko‘rilmagan ishni amalga oshirib, vakillarimizni qit’a chempionatining yarim finaliga olib chiqdi”.
Jahon va Osiyo chempionatlarining saralash uchrashuvlari, Osiyo Kubogi va Osiyo o‘yinlarida o‘tkazilgan bahslar inobatga olingan statistikaga ko‘ra, Rustam Akramov o‘z davrida 7 ta o‘yinning barchasini yutgan. Abramov esa 6 o‘yindan 3 tasini yutib, 2 ta mag‘lubiyat hamda 1 marta durang o‘ynagan.
Futbol yangi inqilob bo‘sag‘asida – FIFA futbol qoidalariga o‘zgartirish xususida muhokama yuritishni boshlagan. Kiritilishi mumkin bo‘lgan o‘zgarishlardan bugungi kunda barchaga ma’lum bo‘lib ulgurgani – gol kiritilgani borasida muammo yuzaga kelgan mahalda uni aniqlash uchun zamonaviy texnologiyadan foydalanish.
Barchaga ma’lum, bugungi kunda aksariyat musobaqalarda gol bo‘lgani haqidagi ma’lumot hakamning qo‘l soatiga keladi. Shuningdek, qo‘shimcha bo‘limlarda yana bitta zaxira almashtirishga ruxsat berish va o‘yinlarga ayol hakamlarni ko‘proq jalb qilish takliflari ham hozir kunda amalda.
Izoh (0)