Тошкентда Янги йил кечаси қўлбола «огнетушитель» портлатган 8 кишига ҳукм ўқилди

Тошкент шаҳрида жойлашган «Самарқанд дарвоза» савдо мажмуаси олдида 1 январь куни фуқаролар Янги йилни нишонлаш мақсадида қўлбола «огнетушитель» портлатгани, оқибатда ҳолатни видеога олаётган 3 киши жароҳатлангани хабар қилинганди. Тошкент шаҳар судларининг маълум қилишича, Жиноят ишлари бўйича Шайхонтоҳур туман судида «огнетушитель» портлатган 8 нафар йигитга ҳукм ўқилган.

Портлаш 1 январь куни соат 00:45 атрофида Шайхонтоҳур тумани Қоратош кўчасида содир бўлган. Байрам баҳона йиғилган бир нечта фуқаролар автойўлни ажратиб турувчи тўсиққа мушакбозлик қилиш мақсадида қўлбола усулда ясалган ўт ўчириш мосламасини жойлаштирган. Тагидан олов ёқилиши оқибатида мослама портлаб, бўлакларга бўлиниб кетган.

Қайд этилишича, аввалги йилларда ҳам шундай ўт ўчиргичларда синаб кўрилган портлашларни интернет орқали кўрган йигит янгийўллик таниши билан боғланиб, шунақа мослама топиб беришини сўраган.

«Воқеа жойидан 35 метр узоқликда турган эдим. Портлагандан кейин оёғимда тегди, сезганим йўқ. Кейин бегона болалар оёғим қонаётганини айтиб, шифохонага олиб боришди. Тўртта бармоқ синган деб ташхис қўйишди. Битта бармоғимни олиб ташлашган, кейинги операцияда пай билан нервларни улашади. 55 кун даволандим. Судланувчилардан бири моддий ёрдам кўрсатди. Ҳеч кимдан даъвойим йўқ, судга ҳавола қиламан», — дейди жабрланувчи.

Таъкидланишича, судланувчиларнинг энг каттаси — 25, кичиги эса 19 ёшда.

Жиноят ишлари бўйича Шайхонтоҳур туман судида кўриб чиқилган ишда судланувчи Жиноят кодексининг 250-1-моддаси (портлаш хавфи бўлган моддалар ёки пиротехника буюмларидан фойдаланиш қоидаларини бузиш) 2-қисми «б, д» бандлари билан айбдор деб топилган ва тўрт йилга озодликдан маҳрум этилган. Шунингдек, яна тўрт нафар судланувчи — тўрт йил муддатга озодликдан маҳрум этиш, яна уч нафарига тўрт йил муддатга озодликни чеклаш жазоси тайинланган.

Эслатиб ўтамиз, 1 январь куни Сирдарё вилоятида ҳам шунга ўхшаш ҳолат содир бўлган. Сирдарё тумани «Дўстлик» маҳалласида яшовчи фуқаро (2003 йилда туғилган) ўт ўчириш мосламаси портлатгани учун 15 суткага қамалган.