O‘qituvchisi tomonidan kaltaklangan o‘quvchi voqeasi ortidan sinf rahbari ham ishdan olindi. Direktor ishdan bo‘shash haqida ariza yozdi

Surxondaryo viloyatining Bandixon tumanida o‘qituvchisi tomonidan kaltaklangan o‘quvchi voqeasi ortidan o‘quvchining sinf rahbari ham ishdan olindi. Maktab direktori bo‘shash haqida ariza yozdi. Bu haqda viloyat xalq ta’limi boshqarmasining rasmiy axborotida ma’lum qilingan.

Ingliz tili fani o‘qituvchisi Y.SH 2022-yil 27-aprel kuni dars jadvali asosida 9-“B” sinf o‘quvchilariga dars o‘tgan. Mashg‘ulot davomida 9-“B” sinf rahbari E.J sinfxonaga kirib kelib, 9-“B” sinf o‘quvchilarining o‘zaro janjalini ijtimoiy tarmoqda kim tarqatganini muhokama qilgan. 9-“B” sinf o‘quvchisi X.I., sinf rahbari E.J va ingliz tili fani o‘qituvchisi Y.SH.ga gap qaytargani uchun Y.SH jahl ustida o‘quvchini kaltaklagan. Ushbu holat 9-“B” sinf o‘quvchilari tomonidan videoga olingan va 15-may kuni ijtimoiy tarmoqlarda tarqatilgan. Masala bo‘yicha tuman hokimligi, tuman prokuraturasi, ichki ishlar bo‘limi va tuman xalq ta’lim bo‘limi mas’ul xodimlari tomonidan maktabda o‘rganish o‘tkazilib, pedagog jamoa a’zolari va o‘qituvchilar bilan ta’lim-tarbiya jarayoni bo‘yicha suhbatlashilgan. Hamda 2022-yil 27-aprel kuni sodir bo‘lgan voqeaga aniqlik kiritildi, — deyiladi rasmiy munosabatda.

Aytilishicha, o‘rganish ishlari davomida maktabning 9-“A” sinf o‘quvchilari fikri ham o‘rganilgan bo‘lib, ular 9-“B” sinf o‘quvchilarining odob-axloq qoidalariga rioya qilmasligini, tengdoshlari bilan ko‘p janjal qilishini ma’lum qilgan.

“Aynan ushbu o‘quvchilarning ota-onalariga farzandlarining xulqi va darsga tayyorlanmasdan kelishi yuzasidan alohida ko‘rsatmalar hamda tavsiyalar berib borilgan”, — deyiladi boshqarma axborotida.

Maktabda ta’lim-tarbiya ishlari hamda pedagog xodimlarning  odob-axloq qoidalari, ichki mehnat tartib qoidalariga amal qilishini yetarli ravishda nazorat qilmaganligi uchun 4-maktab direktori X.B.dan mehnat shartnomasini bekor qilish to‘g‘risida boshqarma boshlig‘i nomiga ariza olingan.

Videoda o‘quvchisining kaltaklanishini tomosha qilib turgan 9-“B” sinf rahbari E.J. bilan tuzilgan mehnat shartnomasi ham belgilangan tartibda bekor qilingan. Shuningdek, direktorning o‘quv ishlari bo‘yicha o‘rinbosari N.A ham ishdan olingan.

Avvalroq o‘quvchiga zo‘ravonlik qilgan o‘qituvchi va maktab direktorining ma’naviy-ma’rifiy ishlar bo‘yicha o‘rinbosari ishdan olingani haqida xabar berilgandi.